Man City និង Chelsea កំពុង​ប្រឈម​នឹង​ការ​កាត់​ចេញ​ពីក្របខណ្ឌ​កំពូល​របស់​អង់គ្លេស Premier League

ក្លឹប​បាល់​ទាត់​ធំៗ 2 របស់​អង់គ្លេស​ដែល​មាន Manchester City និង​តោខៀវ Chelsea អាច​ត្រូវ​បាន​បណ្តេញ​ចេញ​ពី​ក្របខ័ណ្ឌ​កំពូល​របស់​ប្រទេស ដោយ​ពួក​គេ​បាន​ពាក់​ព័ន្ធ​នឹង​ការ​រំលោភ​បំពាន​ច្បាប់​ហិរញ្ញ​វត្ថុ​របស់​បាល់ទាត់ នេះ​បើ​យោង​តាម​កាសែត Daily Mail បាន​ចុះ​ផ្សាយ។

យ៉ាង​ណា​មិញ Man City ត្រូវ​បាន​ចោទ​ប្រកាន់​ពី​បទ​រំលោភ​លើ​ច្បាប់​នៃ​តុល្យភាព​ផ្នែក​ហិរញ្ញវត្ថុ​ចំនួន 115 ករណី គិត​ចាប់​តាំង​ពី​ឆ្នាំ 2009 មក ខណៈ​ដែល​ក្លឹប​តោខៀវ Chelsea ត្រូវបាន​គេ​សង្ស័យ​ថា បាន​សូកលុយ​​ដើម្បី​សម្រប​សម្រួល​ដល់​កិច្ចព្រម​ព្រៀង​ណា​មួយ​ដោយ​ខុស​ច្បាប់។ ប្រសិន​បើ​គេ​រក​ឃើញ​ថា ក្លឹប​ទាំង 2 នេះ​មាន​កំហុស​ពិត​ប្រាកដ​មែន​នោះ ពួក​គេ​នឹង​ត្រូវ​កាត់​ចេញ​ពី​ក្របខណ្ឌ​កំពូល​របស់​អង់គ្លេស Premier League (EPL)។

ដោយ​ឡែក​នៅ​មួយ​រយៈ​ពេល​ថ្មីៗ​នេះ សហភាព​សហព័ន្ធ​បាល់ទាត់​អឺរ៉ុប (UEFA) ទើប​នឹង​បាន​ពិន័យ​ក្លឹប​អេស្ប៉ាញ Barcelona ជា​ទឹកប្រាក់​ចំនួន 500,000 អឺរ៉ូ សម្រាប់​ការ​បំពាន​ច្បាប់​ហិរញ្ញ​វត្ថុ ខណៈ​ដែល Everton ឯណោះ​វិញ ក៏​បាន​រង​ការពិន័យ​ដោយ​កាត់ 10 ពិន្ទុ ពី​តារាង Premier League ក្នុង​ករណី​នៃ​ការ​បំពាន​ស្រដៀង​គ្នា​នេះ​ដែរ។

ប្រភព: Telecomasia