បាល់ទាត់អន្តរជាតិ
មកទៀតហើយ! Carragher លើកឡើងថា Ronaldo មិនដែលស្ថិតនៅកម្រិតក្បែរ រឺជិត Lionel Messi ឡើយ
អតីតកីឡាករមួយរូបរបស់ក្លឹបហង្សក្រហម Liverpool គឺលោក Jamie Carragher បានលើកឡើងពីការប្រៀបធៀបកីឡាករឆ្នើម Lionel Messi និង Cristiano Ronaldo បើទោះបីជាពេលនេះអ្នកទាំង 2 មានវ័យកាន់តែច្រើន ហើយចាកចេញពីការប្រកួតប្រជែងបាល់ទាត់ក្នុងតំបន់អឺរ៉ុបក៏ដោយ។
កាលពីខែមុន Lionel Messi ដែលជាខ្សែប្រយុទ្ធរបស់ក្លឹប Inter Miami បានឈ្នះពាន Ballon d’Or ជាលើកទី 8 ក្នុងអាជីពរបស់គាត់ ខណៈដែល Cristiano Ronaldo មិនស្ថិតក្នុងចំណោមបេក្ខភាព 30 នាក់ចុងក្រោយសម្រាប់ការប្រជែងពាននេះឡើយ។ ថ្មីៗនេះរបាយការណ៍នៃការវិភាគរបស់ FFT បានបង្ហាញផងដែរថា Messi បានវ៉ាដាច់ Ronaldo ក្នុងចំណាត់ថ្នាក់ជាកីឡាករបាល់ទាត់ល្អបំផុតប្រចាំសតវត្សថែមទៀតផង។
ដោយឡែក អតីតខ្សែការពារក្រុមជម្រើសជាតិអង់គ្លេស និងបច្ចុប្បន្នគឺជាអ្នកវិភាគបាល់ទាត់លោក Jamie Carragher បាននិយាយប្រាប់ CBS Sports Golazo ថា៖ “វាមិនដែលជាការជជែកដេញដោលប្រៀបធៀបអ្វីទេ។ Cristiano Ronaldo មិនស្ថិតនៅជិតកម្រិតរបស់ Messi ឡើយ។ Ronaldo គឺជាអ្នកស៊ុតបញ្ចូលទីដ៏អស្ចារ្យបំផុតក្នុងពិភពបាល់ទាត់ តែ Messi គឺជាកីឡាករដ៏អស្ចារ្យបំផុតក្នុងប្រវត្តិសាស្ត្រ។ Ronaldo ស៊ុតបញ្ចូលទី Messi ស៊ុតបញ្ចូលទី និងជាកីឡាករដ៏អស្ចារ្យមិនគួរឲ្យជឿ”។
ប្រភព: Telecomasia