ឥណ្ឌូណេស៊ី ត្រៀម​ចាប់​ដៃ​គ្នា​ជាមួយ​សិង្ហបុរី ដើម្បី​​ធ្វើ​ជា​ម្ចាស់​ផ្ទះ​នៃ​ព្រឹត្តិការណ៍ World Cup U-20 ឆ្នាំ 2025

លោក​ប្រធានា​ធិបតី Joko Widodo បាន​និយាយ​កាល​ពី​ថ្ងៃចន្ទ​នេះ​ថា ប្រទេស​ឥណ្ឌូណេស៊ី​របស់​លោក នឹង​ផ្ញើ​សេចក្តី​ប្រកាស​ពី​ការ​ចាប់​អារម្មណ៍​ទៅ​កាន់​ស្ថាប័ន​គ្រប់គ្រង​បាល់ទាត់​ពិភព​លោក FIFA ខណៈ​ដែល​សិង្ហបុរី​​កំពុង​ស្វែងរក​ប្រ​ទេស​ជាដៃ​គូ​របស់​ខ្លួន ក្នុង​ការ​ទទួល​ធ្វើ​ជា​ម្ចាស់​ផ្ទះ​នៃ​ការ​ប្រកួត​បាល់ទាត់​ពិភពលោក​អាយុ​ក្រោម 20 ឆ្នាំ 2025។ យ៉ាង​ណា​មិញ លោក​ប្រធានា​ធិបតី Joko Widodo បាន​និយាយ​ដោយ​ឈរ​ក្នុង​គោលជំហរ​ច្បាស់លាស់​ថា “ខ្ញុំ​ជឿថា​សិង្ហបុរី និង​ឥណ្ឌូនេស៊ី​អាច​ជា​ម្ចាស់​ផ្ទះ​ដ៏​ល្អ​បាន”។

ដោយ​ឡែក​ប្រទេស​ជា​ម្ចាស់​ផ្ទះ​នៃ​ព្រឹត្តិការណ៍​នេះ នឹង​មាន​លក្ខណៈ​គ្រប់គ្រាន់​សម្រាប់​ការ​ចូលរួម​ប្រកួត​ដោយ​ស្វ័យប្រវត្តិ​នៅ​វគ្គ​ជម្រុះ​តាម​ពូល ដែល​មាន​ន័យ​ថា ប្រសិន​បើ​ការ​ដេញ​ថ្លៃ​របស់​សិង្ហបុរី និង​ឥណ្ឌូណេស៊ី ត្រូវ​បាន​ទទួល​យក​ដោយ​ស្ថាប័ន​បាល់ទាត់​ពិភពលោក នោះ​សិង្ហបុរី​នឹងមាន​ឈុត​យុវជន​របស់​ខ្លួន លេង​ពាន World Cup U-20 ជា​លើក​ដំបូង​ក្នុង​ប្រវត្តិសាស្ត្រ​បាល់ទាត់​របស់​ពួក​គេ។

សម្រាប់​ព្រឹត្តិការណ៍​នៃ​ការ​ប្រកួត FIFA World Cup U-20 និង FIFA World Cup U-17 គឺ​ជា​ការ​ប្រកួត​រៀងរាល់ 2 ឆ្នាំ​ម្ដង ហើយ​នៅ​ឆ្នាំ 2025 ជា​ឆ្នាំ​ដែល​ត្រូវ​លេង​ម្ដង​ទៀត។ ការ​រៀប​ចំ​ប្រកួត​នេះ មាន​គោល​បំណង​ផ្តល់​ឱកាស​ដល់​កីឡាករ​យុវជន ក្នុង​ការ​ប្រកួត​កម្រិត​អន្តរជាតិ ជា​ពិសេស​គេ​មិន​អាច​រៀប​ចំ 4 ឆ្នាំ​ម្ដង​ដូច​ក្រុម​ឈុត​ធំ​ឡើយ ព្រោះ​កីឡាករ​អាច​នឹង​លើស​អាយុ ហើយ​អស់​ឱកាស។

ប្រភព: Thehindu