Adrien Rabiot បដិសេធ​មិន​ផ្ទេរ​ទៅ​ទឹកដី​អង់គ្លេស ដើម្បី​ចូលរួម​ជាមួយ​បិសាចក្រហម

កីឡាករ Adrien Rabiot ត្រូវ​បាន​គេ​រាយការណ៍​ថា បាន​ត្រៀម​ខ្លួន​រួច​ជា​ស្រេច ដើម្បី​បដិសេធ​ឱកាស​ក្នុង​ការ​ចូលរួម​ជាមួយ​ក្លឹប​បិសាចក្រហម Manchester United លើ​ការ​ផ្ទេរ​ដោយ​គ្មាន​តម្លៃ​ខ្លួន​នៅ​ចុង​បញ្ចប់​នៃ​រដូវកាល​នេះ ហើយ​កំពុង​ត្រៀម​បន្ត​កុងត្រា​ថ្មី​របស់​គាត់​នៅ Juventus បន្ថែម​មួយ​​រដូវកាល​ទៀត។

កីឡាករ​វ័យ 28 ឆ្នាំ​រូបនេះ​ត្រូវ​បាន​ផ្សារ​ភ្ជាប់​យ៉ាង​ខ្លាំង ជាមួយ​នឹង​ការ​ផ្ទេរ​ទៅ Old Trafford កាល​ពី​រដូវ​ក្តៅ​ឆ្នាំ 2022 ប៉ុន្តែ​គេ​បាន​ដឹង​ថា ការ​ទាមទារ​ប្រាក់​ពលកម្ម​របស់​គាត់​ច្រើន​ពេក បាន​ធ្វើ​ឲ្យ Man United ដកខ្លួន​ចេញ​ពី​ការ​ចង់​បាន​ខ្សែបម្រើ​ឆ្នើម​រូប​នេះ។ កាល​ពី​ដើម​រដូវកាល Adrien Rabiot ស្ទើរ​តែ​ក្លាយ​ជា​កីឡាករ​ដែល​គ្មាន​តម្លៃ​ខ្លួន​ទៅ​ហើយ ប៉ុន្តែ​ទីបំផុត​គាត់​បាន​សម្រេច​ចិត្ត​បន្ត​កុងត្រា​ថ្មី​រយៈពេល​មួយ​ឆ្នាំ​ទៀត​ជាមួយ Juventus ដើម្បី​បន្ត​អាជីព​នៅ​រដូវកាល 2023-2024 នេះ។

ដោយ​ឡែក​បិសាចក្រហម​នៅ​តែ​មាន​ចិត្ត​ចង់​បាន Adrien Rabiot ហើយ​នៅ​ចុង​បញ្ចប់​នៃ​រដូវកាល​នេះ គាត់​នឹង​ក្លាយ​ជា​កីឡាករ​ដែល​គ្មាន​តម្លៃ​ខ្លួន និង​មិន​ចាំ​បាច់​ចំណាយ​ប្រាក់​ផ្ទេរ​ឡើយ។ ទោះ​បី​ជា​យ៉ាង​ណា​ក៏​ដោយ បើ​យោង​តាម​គេហទំព័រ Gazzetta dello Sport បាន​ឲ្យ​ដឹង​ថា កីឡាករ​សញ្ជាតិ​បារាំង​រូប​នេះ​មិនចាកចេញ​ពី​ទឹកដី​អ៊ីតាលី​ឡើយ ដោយ​សារ​តែ​គាត់​ពេញ​ចិត្ត​នឹង​ការ​លេង​ក្រោម​ការ​ដឹកនាំ​របស់​គ្រូបង្វឹក​លោក Massimiliano Allegri ស្រប​ពេល​ដែល​ទម្រង់​លេង​របស់​ក្រុម​ក៏​កំពុង​មាន​ភាព​ល្អ​ប្រសើរ​ឡើង​វិញ​ផង​ដែរ។ Juventus នឹង​ផ្តល់​កុងត្រា​រយៈពេល​មួយ​ឆ្នាំ​ទៀត​ដល់ Rabiot ដើម្បី​ឲ្យ​គាត់​នៅ​ជាមួយ​ពួក​គេ​រហូត​ដល់​រដូវក្តៅ​ឆ្នាំ 2025 ខណៈ​ដែល​ប្រាក់​ពលកម្ម​របស់​គាត់​នៅ​ដដែល។

ប្រភព: Sportsmole