Marcus Rashford បាត់​បង់​ទំនុក​ចិត្ត​លើ​ការ​ដឹកនាំ​របស់ Erik ten Hag

ខ្សែប្រយុទ្ធ Marcus Rashford ត្រូវ​​បាន​​គេ​រាយការណ៍​ថា គឺ​ជា​កីឡាករ​ម្នាក់​ដែល​ស្ថិត​ក្នុង​ចំណោម​កីឡាករ​ផ្សេង​ទៀត​របស់ Manchester United ដែល​បាន​បាត់​បង់​ជំនឿ​ចិត្ត​លើ​វិធីសាស្ត្រ​នៃ​ការ​ដឹកនាំ​របស់​លោក Erik ten Hag ស្រប​ពេល​ដែល​មាន​ពាក្យ​ចចាម​អារ៉ាម​ថា កីឡាករ​របស់​ក្លឹប​ចង់​ឲ្យ​គ្រូ​បង្វឹក​រូប​នេះ​ចេញ​ពី​តំណែង។

យ៉ាង​ណា​មិញ គ្រូ​បង្វឹក​​​វ័យ 53 ឆ្នាំ​រូបនេះ​ធ្លាប់​ត្រូវ​បាន​គេ​ចាត់​ទុក​ជា​គ្រូ​បង្វឹក​ឆ្នើម​មួយ​រូប​ក្នុង​អំឡុង​ពេល​គាត់​ដឹកនាំ​នៅ AFC Ajax ដោយ​ជោគជ័យ ដោយ​ពេល​នោះ​ក្លឹប​ហូឡង់​មួយ​នេះ​បាន​ឡើង​ដល់​ការ​ប្រកួត​វគ្គពាក់​កណ្តាល​ផ្តាច់ព្រ័ត្រ​នៃ​ក្របខ័ណ្ឌ UEFA Champions League រដូវកាល​ឆ្នាំ 2018-2019 និង​ឈ្នះ​ពានរង្វាន់​លីគ Eredivisie ចំនួន 3 ដង​ផង​ដែរ។

Erik ten Hag ក៏​ជា​មនុស្ស​ម្នាក់​ដែល​ផលិត​ចេញ​នូវ​កីឡាករ​ដ៏​មាន​ទេពសល្យ​មួយ​ចំនួន​ផង​ដែរ ដូច​ជា Frenkie de Jong, Lisandro Martinez, Hakim Ziyech និង Matthijs de Ligt ជា​ដើម។ ទោះ​ជា​យ៉ាង​ណា​ក៏​ដោយ ពេល​គាត់​ចាកចេញ​មក​ដឹកនាំ​នៅ Old Trafford អ្វីៗ​ហាក់​មិន​សម​ប្រកប​ប៉ុន្មាន​ឡើយ បើ​ទោះ​បី​ជា​គាត់​ធ្លាប់​ជួយ​បិសាចក្រហម​ឲ្យ​ឈ្នះពាន EFL Cup ម្ដង កាល​ពី​ឆ្នាំ​មុន​ក៏​ដោយ។

ខណៈ​ពេល​ដែល Erik ten Hag កំពុង​ស្ថិត​នៅ​ក្រោម​កុងត្រា​រហូត​ដល់​ឆ្នាំ 2025 គាត់​កំពុង​ស្ថិត​ក្នុង​ស្ថានភាព​មិន​សូវ​ល្អ​ឡើយ ហើយ​តំណែង​របស់​គាត់​ក៏​អាច​នឹង​ជួប​ហានិភ័យ​មុន​ដល់​ពេល​នៃ​កុងត្រា​ផុត​កំណត់​ផង​ដែរ។ យោងតាម​របាយការណ៍​ពី Football Insider បាន​អះអាង​ថា Rashford ក៏​ជា​កីឡាករ​ម្នាក់​ដែល​លែង​មាន​ជំនឿ​ចិត្ត​លើ​គ្រូ​បង្វឹក​របស់​ខ្លួន​ដែរ ជា​ពិសេស​គឺ​បច្ចេកទេស​ល្បិច​នៃ​ការ​ដឹកនាំ​ក្រុម និង​វិធី​នៃ​ការ​ហ្វឹកហាត់​របស់​គ្រូ​បង្វឹក​រូប​នេះ​មិន​មាន​អ្វី​គួរ​ឲ្យ​ប្រសើរ​ឡើង​ឡើយ។

ប្រភព: Sportsmole