Barcelona ប្ដូរ​ចិត្ត ចង់​ស្នើរ​ខ្ចី​ជើង Joao Felix មួយ​រដូវកាល​ទៀត ដោយ​មិន​ទាន់​សម្រេច​ចិត្ត​ទិញ​ផ្ដាច់​កុងត្រា

ក្លឹប​អ្នក​មាន​បុណ្យ Barcelona ត្រូវ​បាន​គេ​រាយការណ៍​ថា កំពុង​ត្រៀម​ធ្វើ​ការ​ចរចា​ជាមួយ​ក្លឹប Atletico Madrid ដើម្បី​បន្ត​កិច្ច​ព្រមព្រៀង​ខ្ចី​ជើង​សម្រាប់​ខ្សែប្រយុទ្ធ​សញ្ជាតិ​ព័រទុយហ្គាល់ Joao Felix មួយ​រដូវកាល​ក្រោយ​បន្ថែម​ទៀត។

យ៉ាង​ណា​មិញ Joao Felix បាន​ចូលរួម​ជាមួយ​ក្លឹប​យក្ស​កាតាឡាន់ ក្នុង​លក្ខខណ្ឌ​ខ្ចី​ជើង​ពេញ​មួយ​រដូវកាល​ពី Atletico Madrid បន្ទាប់​ពី​គាត់​មិន​សូវ​មាន​ឱកាស​បង្ហាញ​សមត្ថភាព នៅ​ក្រោម​ការ​ដឹកនាំ​របស់​គ្រូ​បង្វឹក​លោក Diego Simeone។

កីឡាករ​វ័យ 24 ឆ្នាំ​រូបនេះ​ហាក់​មាន​ទម្រង់​លេង​ល្អ​ជា​ថ្មី​ម្ដង​ទៀត ពេល​លេង​ជាមួយ Barcelona។ នៅ​រដូវកាល​នេះ គាត់​បាន​រួម​ចំណែក​ស៊ុត​បញ្ចូលទី​ចំនួន 6 គ្រាប់ និង Assists ចំនួន 3 ដង​ក្នុង​ការ​បង្ហាញ​ខ្លួន 20 ប្រកួត។ ជាមួយ​នឹង​ទម្រង់​លេង​ដ៏​លេចធ្លោរ ដែល​អាច​ទទួល​យក​បាន​បែប​នេះ មាន​ការអះអាង​ជា​ច្រើន​កាល​ពី​ប៉ុន្មាន​សប្ដាហ៍​មុន​ថា Barcelona នឹង​សម្រេច​ចិត្ត​ទិញ​ផ្ដាច់​កុងត្រា​របស់​គាត់​ពី​អតីត​ក្លឹប​ចាស់​នៅ​ចុង​បញ្ចប់​នៃ​រដូវកាល​នេះ។

ទោះ​ជា​យ៉ាង​ណា​ក៏​ដោយ ពេល​នេះ​យោងតាម​របាយការណ៍​ពី Goal បាន​ឲ្យ​ដឹង​ថា Barcelona បាន​រៀបចំ​ផែនការ​ខ្ចី​ជើង​ជា​លើក​ទី 2 សម្រាប់ Joao Felix ខណៈ​ដែល​ពួក​គេ​ចង់​ទទួល​បាន​ឱកាស​ប្រមូល​ថវិកា​ដើម្បី​ទិញ​ខ្សែប្រយុទ្ធ​សញ្ជាតិ​ព័រទុយហ្គាល់​រូប​នេះ​នៅ​រដូវកាល​បន្ទាប់។ គេ​បាន​ដឹង​ថា បញ្ហា​ហិរញ្ញ​វត្ថុ​របស់ Barcelona អាច​នឹង​ធ្លាក់​ចូល​វិបត្តិកាន់​តែ​ធ្ងន់ធ្ងរ​ជា​ថ្មី​ម្ដង​ទៀត​ប្រសិន​បើ​ពួក​គេ​ទិញ​ផ្ដាច់​កុងត្រា​របស់ Joao Felix និង Joao Cancelo ក្នុង​ពេល​ដំណាល​គ្នា នា​ចុង​បញ្ចប់​នៃ​រដូវកាល​នេះ។

ប្រភព: Sportsmole