Cristiano Ronaldo និង Messi ជាប់​ឈ្មោះ​ក្នុង​បេក្ខភាព FIFPro ប្រចាំ​ឆ្នាំ 2023

កាល​ពី​ម្សិលមិញ​នេះ សហព័ន្ធ​សហភាព​កីឡាបាល់​ទាត់​អាជីព FIFPRO បាន​ចេញ​ផ្សាយ​ជាផ្លូវការ​នូវ​បញ្ជី​ឈ្មោះ​កីឡាករ​ចំនួន 23 នាក់​ចុង​ក្រោយ ដែល​មាន​លក្ខណៈ​គ្រប់គ្រាន់​សម្រាប់​ការ​ជ្រើសរើស​កីឡាករ​ល្អ​បំផុត​ទាំង 11 រូប ប្រចាំ​ឆ្នាំ 2023។

ក្នុង​ចំណោម​បញ្ជី​បេក្ខភាព​ដែល​គួរ​ឲ្យ​ចាប់​អារម្មណ៍ និង​អាច​ឈាន​ដល់​ដំណាក់​កាល​នៃ​ការ​ឈ្នះ​ពាន FIFPro នោះ​​គឺ​អាច​ជា​ខ្សែប្រយុទ្ធ​អាហ្សង់ទីន Lionel Messi និង​ខ្សែប្រយុទ្ធ​របស់​ក្លឹប Al-Nassr គឺ Cristiano Ronaldo។ ផ្សេង​ពី​នេះ​ទៀត​គឺ​ខ្សែប្រយុទ្ធ Erling Haaland របស់ Man City និង​ខ្សែប្រយុទ្ធ​ក្រុម​ជម្រើស​ជាតិ​បារាំង Kylian Mbappe។

សម្រាប់​កីឡាករ​ល្អ​បំផុត​ទាំង 11 នាក់​ប្រចាំ​ឆ្នាំ​នឹង​ត្រូវ​បាន​ជ្រើសរើស​ដោយ FIFPro និង FIFA ហើយ​អ្នក​ឈ្នះ​នឹង​ត្រូវ​បាន​ប្រកាស​នៅ​ថ្ងៃទី 15 ខែ​មករា ឆាប់ៗ​នេះ ក្នុង​ពិធី​ប្រគល់​ពាន​រង្វាន់​កីឡាករ​បាល់ទាត់​ល្អ​បំផុត​ប្រចាំ​ឆ្នាំ​របស់ FIFA នៅ​ក្នុង​ទីក្រុង​ឡុងដ៍។

យោងតាម​គេហទំព័រ Hopper HQ កាល​ពី​ថ្ងៃ​ទី 30 ខែ​ធ្នូ ឆ្នាំ​មុន ពួក​គេ​បាន​បង្ហាញ​ថា Cristiano Ronaldo បាន​វ៉ាដាច់ Messi ក្នុង​ចំណាត់​ថ្នាក់​កីឡា​ឆ្នើម​បំផុត​របស់​ពិភពលោក​សម្រាប់​ស្ថិតិ​នានា​ប្រចាំ​ឆ្នាំ 2023។ ស្រប​ពេល​ជាមួយ​គ្នា​នោះ​ក៏​មាន​រឿង​ដ៏​អស្ចារ្យ​មួយ​បាន​កើត​ឡើង​ដែរ​ដោយ​លោក Claudio Tapia ប្រធាន​សមាគម​បាល់ទាត់​អាហ្សង់ទីន បាន​ប្រកាស​ពី​ចេតនា​របស់​គាត់​ក្នុង​ការចូល​និវត្តន៍​អាវ​លេខ 10 របស់ Messi នៅ​ក្នុង​ក្រុម​ជម្រើស​ជាតិ ដើម្បី​បង្ហាញ​ពី​ការ​គោរព និងឲ្យ​តម្លៃ​កាន់​តែ​ខ្លាំង​ដល់​ខ្សែប្រយុទ្ធ​ឆ្នើម​ក្នុង​ប្រវត្តិសាស្ត្រ​បាល់ទាត់​រូប​នេះ។

ប្រភព: Telecomasia