Eric Dier ត្រៀម​ចាកចេញ​ទៅ​ចូលរួម​ជាមួយ Bayern Munich

ខ្សែ​ការពារ Eric Dier របស់​ក្លឹប​មាន់ខ្នាយមាស Tottenham Hotspur ត្រូវ​បាន​គេ​អះអាង​ថា ជិត​នឹង​ឈាន​ដល់​ការ​ចុះ​ហត្ថលេខា​ចូលរួម​ជាមួយ Bayern Munich ហើយ។ បន្ទាប់​ពី 9 ឆ្នាំ ដែល​គាត់​បាន​រួម​រស់ជាមួយ Tottenham Hotspur ខ្សែការពារ​រូប​នេះ​បាន​បង្ហាញ​ខ្លួន​សរុប 361 ប្រកួត។

យ៉ាង​ណា​មិញ Eric Dier គឺ​ជា​អតីត​កីឡាករ​របស់​ក្លឹប Sporting CP ដែល​បាន​ផ្លាស់​មក​ទឹកដី​កំណើត​របស់​ខ្លួន​វិញ​នៅ​ឆ្នាំ 2014។ ទោះ​ជា​យ៉ាង​ណា កីឡាករ​វ័យ 29 ឆ្នាំ​រូបនេះ មិន​មែន​ជា​កីឡាករ​សំខាន់ និង​ស្ថិត​ក្នុង​ផែនការ​របស់​គ្រូបង្វឹក​លោក Ange Postecoglou នៅ​រដូវកាល​នេះ​ឡើយ ហើយ​គិត​ចាប់​តាំង​ពី​ដើម​រដូវកាល​ដល់​ពេល​នេះ​គាត់​ចូល​លេង​បាន​សរុប​ត្រឹមតែ 198 នាទី​ប៉ុណ្ណោះ នៃ​ការ​ប្រកួត Premier League។

ខ្សែការពារ​សញ្ជាតិ​អង់គ្លេស​រូប​នេះ ត្រូវ​បាន​គេ​មើល​ឃើញ​ជា​យូរ​មក​ហើយ​ថា គាត់​នឹង​ចាកចេញ​ពី Tottenham Hotspur នៅ​ចុង​បញ្ចប់​នៃ​រដូវកាល​នេះ រឺ​ពេល​ឆាប់ៗ​ខាង​មុខ។ បើ​តាម​ការ​ចុះផ្សាយ​របស់ Football Insider បាន​ឲ្យ​ដឹង​ថា Eric Dier កំពុង​ត្រៀម​ចាកចេញ​ពី​ទឹកដី​អង់គ្លេស​រួច​ហើយ ដើម្បី​ប្តូរ​ទៅ​ប្រទេស​អាឡឺម៉ង់​ដោយ​ចូលរួម​ជាមួយ​ក្លឹប Bayern Munich។ គេ​បាន​ដឹង​ថា Eric Dier បាន​យល់​ព្រម​លើ​លក្ខខណ្ឌ​ផ្ទាល់​ខ្លួន ជាមួយ​ក្លឹប​យក្ស​នៅ Bundesliga រួច​ហើយ ហើយ Tottenham Hotspur ក៏​បាន​រក​អ្នក​ជំនួស​តំណែង​របស់​គាត់​រួច​ហើយ​ផង​ដែរ។

ប្រភព: Sportsmole