Amad Diallo ឆ្លើយ​តប​បែប​នេះ នៅ​ពេល​ត្រូវ​បាន​គេ​ប្រៀបធៀប​គាត់​ទៅ​នឹង Lionel Messi

ខ្សែប្រយុទ្ធ​វ័យ​ក្មេង Amad Diallo របស់​ក្លឹប​បិសាចក្រហម Manchester United ត្រូវ​បាន​គេ​ប្រៀបប្រដូច​ទៅ​នឹង​តារា​ឆ្នើម Lionel Messi ហើយ​ជា​ពិសេស​នៅ​ក្នុង​ប្រទេស​របស់​គាត់ អ្នកគាំទ្រ​បាល់ទាត់​ជា​ច្រើន​បាន​ដាក់​រហ័ស្សនា​របស់ Amad Diallo ថា​ជា “Messi កូតឌីវ័រ” ថែម​ទៀត​ផង។

លើស​ពី​នេះ​ទៀត ក្នុង​អំឡុង​ពេល​កីឡាករ​វ័យ​ក្មេង​រូប​នេះ​​លេង​នៅ​អតីត​ក្លឹប​ចាស់ Atalanta BC គាត់​ត្រូវ​បាន​មិត្ត​រួម​ក្រុម​របស់​ខ្លួន Papu Gomez ដែល​ធ្លាប់​បាន​ឈ្នះពានបាល់​ទាត់​ពិភពលោក​ជាមួយ​អាហ្សង់ទីន​ក្នុង​ឆ្នាំ 2022 ជាមួយ Messi ដែរ​នោះ ក៏​បាន​លើក​ឡើង​ថា៖ “សូម​ជឿ​ខ្ញុំ គាត់ (Amad Diallo) គឺ​ជា​តារារះ​នា​ពេល​អនាគត។ ក្នុង​អំឡុង​ពេល​នៃ​ការ​ហ្វឹកហាត់​របស់​យើង​ជាមួយ​គាត់ មើល​ទៅ​គាត់​ហាក់​ដូចជា Lionel Messi! អ្នក​មិន​អាច​បញ្ឈប់​គាត់​បាន​ទេ”។

ទោះ​ជា​យ៉ាង​ណា​ក៏​ដោយ Amad Diallo បាន​បដិសេធ​ចំពោះ​ការ​ប្រៀប​ប្រដូច​គាត់​ទៅ​នឹង​ម្ចាស់​ពាន Ballon D’Or 8 សម័យ​កាល Lionel Messi ដោយ​អះអាង​ថា Messi ជា​កីឡាករ​ឆ្នើម​ម្នាក់ ដ៏​អស្ចារ្យ​បំផុត​មិន​អាច​មាន​អ្នក​ណា​ប្រដូច​បាន​ឡើយ។

នៅ​ក្នុង​បទសម្ភាសន៍​មួយ​កាល​ពី​ពេល​ថ្មីៗ​នេះ Amad Diallo បាន​និយាយ​ថា៖ “ពួក​គេ​បាន​លើក​ឡើង​ថា ខ្ញុំ​ដូច​ជា Lionel Messi ក្នុង​ពេល​ហ្វឹកហាត់ ប៉ុន្តែ​គ្មាន​នរណា​ម្នាក់ លេង​ដូច Messi បាន​ឡើយ។ គ្មាន​នរណា​ម្នាក់​លេងដូច Messi ទេ។ ខ្ញុំ​មាន​មោទនភាព​ដែល​គាត់ (Gomez) និយាយ​ថា ខ្ញុំ​លេង​ដូច Messi ប៉ុន្តែ​ខ្ញុំ​និយាយ​​ថា គ្មាន​នរណា​ម្នាក់​លេង​ដូច Messi ទេ!។ ក្នុង​ការ​ហ្វឹកហាត់ ខ្ញុំ​គឺដូច​គ្នា​បន្តិចបន្ដួច និង​ការ​ញាក់បាល់ដែល​ស្រដៀង Messi ដូច្នេះ​ពួកគេ​និយាយ​ថា ទម្រង់​លេង​របស់​ខ្ញុំ​គឺ​ដូចជា Messi ប៉ុន្តែ​ថ្ងៃនេះ​ខ្ញុំ​នឹង​និយាយ​ថា គ្មាន​នរណា​ម្នាក់​អាច​លេង​ដូច Messi បាន​ទេ”។

ប្រភព: GOAL