Chelsea កំណត់​គោលដៅ​លើ Antonio Silva ដើម្បី​មក​ជំនួស​កន្លែង​របស់ Thiago Silva

ក្លឹប​តោខៀវ Chelsea ត្រូវ​បាន​គេ​រាយការណ៍​ថា បាន​ចូល​រួម​ក្នុង​ការ​ប្រជែង​យក​ Antonio Silva របស់​ក្លឹប Benfica ដោយ​​តោ​ខៀវ​គិត​ថា ខ្សែការពារ​រូប​នេះ​នឹង​ក្លាយ​ជា​​អ្នក​ជំនួស​កន្លែង​ដ៏​សាកសម​បំផុត​របស់ Thiago Silva ដែល​កំពុង​មាន​វ័យ​កាន់​តែ​ច្រើន។

យ៉ាង​ណា​មិញ​សម្រាប់​ខ្សែការពារ​កណ្ដាល Thiago Silva នឹង​ត្រូវ​ផុត​កំណត់​កុងត្រា​របស់​គាត់​ជាមួយ Chelsea នៅ​ចុង​បញ្ចប់​នៃ​រដូវកាល​នេះ ហើយ​គាត់​ត្រូវ​បាន​គិត​ថា នឹង​ចាកចេញ​ពី​ក្លឹប​បច្ចុប្បន្ន​ក្នុង​នាម​ជា​កីឡាករ​ដែល​គ្មាន​តម្លៃ​ខ្លួន។ យ៉ាង​ណា កីឡាករ​ចាស់​វស្សា​ដែល​មាន​វ័យ 39 ឆ្នាំ​​រូបនេះនៅតែ​​ជា​តួអង្គ​ដ៏​សំខាន់​របស់​លោក Mauricio Pochettino ក្នុង​រដូវកាល​នេះ ​ដោយ​បង្ហាញ​ខ្លួន​បាន 21 ប្រកួត និង​រួម​ចំណែក​ស៊ុត​បញ្ចូលទី​បាន 1 គ្រាប់​ផង​ដែរ។

ទោះ​បី​ជា​យ៉ាង​ណា​ក៏ដោយ យោងតាម​គេហទំព័រ Football Insider បាន​ឲ្យ​ដឹង​ថា Thiago Silva នឹង​មិន​បន្ត​កុងត្រា​ថ្មី​ទេ ហើយ​បច្ចុប្បន្ន​តោខៀវ Chelsea កំពុង​ស្វែងរក​អ្នក​ដែល​អាច​ជំនួស​កីឡាករ​សញ្ជាតិ​ប្រេស៊ីល​រូប​នេះ​បាន។ ខ្សែការពារ​សញ្ជាតិ​ព័រទុយហ្គាល់ Antonio Silva ត្រូវ​បាន​គេ​កំណត់​ថា ជា​គោលដៅ​ខ្សែការពារ​ដែល Chelsea ចង់​បាន​ជាង​គេ​នៅ​រដូវក្តៅ​នេះ។

ប្រភព: Sportsmole