ឪពុក​របស់ Messi សង្ឃឹមថា កូន​ប្រុស​របស់​ខ្លួន​អាច​វិល​ត្រឡប់​ទៅ Barcelona វិញ

តារា​ឆ្នើម​អាហ្សង់ទីន​ Lionel Messi ត្រូវ​​បាន​​គេ​ភ្ជាប់​ទៅ​នឹង​ការ​ផ្លាស់​ត្រឡប់​ទៅ​កាន់​អតីត​ក្លឹប​ចាស់ Barcelona វិញ ខណៈ​ដែល​ឪពុក​របស់​គាត់​ក៏​សង្ឃឹម​ដែរ​ថា កូន​ប្រុស​របស់​ខ្លួន​នឹង​អាច​ត្រឡប់​ទៅកាន់​ទឹកដី​នៃ​​​កីឡដ្ឋាន Camp Nou វិញ​នៅ​ថ្ងៃ​ណា​មួយ។

Lionel Messi បាន​ចាកចេញ​ពី​ក្លឹប Barcelona កាល​ពី​រដូវ​ក្តៅ​ឆ្នាំ​មុន បន្ទាប់ពី​កុងត្រា​របស់​គាត់​បាន​ផុត​កំណត់ ខណៈ​ដែល​ក្លឹប​មិន​អាច​មាន​លទ្ធភាព​ផ្តល់​កុងត្រា​ថ្មី​ឲ្យ​គាត់បាន។ Messi បាន​ចាកចេញ​ពី​ក្លឹប Barcelona ទាំង​មិន​បាន​ត្រៀម​ខ្លួន​ជា​មុន ហើយ​ក៏​ចាកចេញ​ទាំង​អាល័យ​ផង​ដែរ ព្រោះ​ខ្លួន​ធ្លាប់​បាន​សន្យា​ថា លេង​នៅ​ក្លឹប Barcelona អស់​មួយ​ជីវិត។ គាត់​តែងតែ​មាន​ចិត្ត​ចង់​ត្រឡប់​ទៅ Barcelona វិញ​ជានិច្ច។

ទោះ​ជា​យ៉ាង​ណា​ក្តី ក្តី​សង្ឃឹម​របស់ Lionel Messi ក្នុង​ការ​វិល​ត្រឡប់​ទៅ​កាន់​ទឹកដី Camp Nou មិន​រលាយ​បាត់​ឡើយ សូម្បី​តែ​គ្រូបង្វឹក​លោក Xavi Hernandez ក៏​បាន​សារភាព​ដែរ​ថា ទ្វារ​​របស់​ក្លឹប​តែងតែ​បើក​ចំហ​សម្រាប់ Messi ក្នុង​ការ​ផ្ទេរ​ត្រឡប់​មក​វិញ​ជា​និច្ច។

គួរ​រំលឹក​ផង​ដែរ​ថា Lionel Messi មាន​ទម្រង់​លេង​មិន​សូវ​ល្អ​ឡើយ សម្រាប់​ក្លឹប​ថ្មី Paris Saint-Germain ដោយ​រក​បាន​គ្រាប់​បាល់ 6 គ្រាប់ ជា​មួយ​នឹង​ការ​បញ្ជូន​បាល់​ឲ្យ​មិត្ត​រួម​ក្រុម​បាន 13 ដង ក្នុង​ការ​បង្ហាញ​ខ្លួន 25 ប្រកួត។

យ៉ាង​ណា​នៅ​ពេល​នេះ Lionel Messi នឹង​មិន​ចាកចេញ​ពី Paris Saint-Germain ឡើយ ហើយ​គាត់​ប្រហែល​ជា​កំពុង​ព្យាយាម​យ៉ាង​ខ្លាំង​ក្នុង​ការ​ផ្ដោត​អារម្មណ៍​សម្រាប់​ការ​ប្រកួត​នៅ​ចុង​ឆ្នាំ​នេះ ក្នុង​ព្រឹត្តិការណ៍ World Cup សម្រាប់​ក្រុម​ជម្រើស​ជាតិ​អាហ្សង់ទីន។

ប្រភព: Goal