បាល់ទាត់អន្តរជាតិ
Van Dijk ចាត់ទុកខ្សែប្រយុទ្ធកណ្ដាលរូបនេះថា ជាកីឡាករដែលគាត់ពិបាកទប់ទល់បំផុត
ខ្សែការពារ Virgil van Dijk របស់ក្លឹបហង្សក្រហម Liverpool បានជ្រើសរើស Olivier Giroud ថាជាគូប្រជែងដ៏ស្វិតស្វាញ និងពិបាកទប់ទល់បំផុតក្នុងចំណោមកីឡាករជាច្រើនទៀតដែលគាត់ធ្លាប់ជួប ហើយគាត់បានចាត់ទុកខ្សែប្រយុទ្ធជើងចាស់របស់ក្លឹប AC Milan រូបនេះថាប្រៀបដូចជា “Bogeyman” ផងដែរ។
យ៉ាងណាមិញកីឡាករវ័យ វ័យ 32 ឆ្នាំ Virgil van Dijk ត្រូវបានគេចាត់ទុកថាជាខ្សែការពារកណ្តាលដ៏ល្អបំផុតម្នាក់នាពេលបច្ចុប្បន្ន ហើយគាត់ធ្លាប់បានប្រកួតតទល់នឹងខ្សែប្រយុទ្ធឆ្នើមៗជាច្រើនក្នុងពិភពបាល់ទាត់ ទាំងក្នុងកម្រិតនៃការប្រកួតរបស់ក្លឹប និងកម្រិតនៃការប្រកួតរបស់ក្រុមជម្រើសជាតិ។
គួររំលឹកផងដែរថា គ្មានកីឡាករណាម្នាក់អាចយកឈ្នះ និងអូសបាល់ផុត Van Dijk បាន ក្នុងរដូវកាលនេះឡើយ ប៉ុន្តែកីឡាករសញ្ជាតិហូឡង់រូបនេះបានសារភាពថា គាត់ពិបាកបិទបំផុតសម្រាប់កីឡាករបារាំង Olivier Giroud ដោយកីឡាករវ័យ 37 ឆ្នាំរូបនេះធ្លាប់ជាអតីតកីឡាកររបស់ក្លឹបកាំភ្លើងធំ Arsenal និងតោខៀវ Chelsea ជាច្រើនឆ្នាំកន្លងមកហើយ។
Virgil van Dijk បាននិយាយថា៖ “គាត់បានស៊ុតបញ្ចូលទីជាញឹកញាប់ពេលលេងតទល់នឹងខ្ញុំ។ ខ្ញុំតែងតែមានអារម្មណ៍ថា ខ្ញុំចាប់គាត់ជាប់ ប៉ុន្តែយ៉ាងណាក៏ដោយ គាត់តែងតែអាចរកគ្រាប់បាល់បាន មិនថាសម្រាប់ពេលវេលាដែលគាត់លេងនៅ Arsenal, Chelsea រឺក្រុមជម្រើសជាតិបារាំងនោះទេ គាត់តែងតែស៊ុតបញ្ចូលទី”។
ប្រភព: Metro UK