Luis Suarez និយាយ​ថា Messi តែងតែ​ចង់​ចូល​និវត្តន៍​នៅ Barcelona

នៅ​ក្នុង​ការ​អត្ថាធិប្បាយ​ចុង​ក្រោយ​មួយ​កាល​ពី​ពេល​ថ្មីៗ​នេះ តារា​ឆ្នើម​របស់​ក្លឹប Inter Miami គឺ​កីឡាករ Luis Suarez បាន​លើក​ឡើង​ថា Lionel Messi មាន​ក្ដី​សុបិន​ចង់​ចូល​និវត្តន៍​នៅ​ក្លឹប Barcelona មុន​ពេល​ដែល​គាត់​បាន​ចូលរួម​ជាមួយ​ក្លឹប​យក្ស​បារាំង PSG ក្នុង​ឆ្នាំ 2021។

ដោយ​ឡែក Suarez បាន​ចាកចេញ​ពី Barcelona មួយ​ឆ្នាំ មុន​ពេល​ដែល​មិត្ត​ជិតស្និទ្ធិ​បំផុត​របស់​គាត់ Lionel Messi ចុះ​ហត្ថលេខា​លើ​ការ​ផ្ទេរ​ដោយ​គ្មាន​តម្លៃ​ខ្លួន​ទៅ​កាន់​ក្លឹប Paris Saint-Germain។ ទោះ​ជា​យ៉ាង​ណា ពេល​នេះ​អ្នក​ទាំង 2 បាន​លេង​ជាមួយ​គ្នា ជា​ថ្មីៗ​ម្ដង​ទៀត​នៅ​ក្លឹប Inter Miami ខណៈ​ដែល Luis Suarez ទើប​នឹង​បាន​ចាកចេញ​ពី Gremio កាល​ពី​ខែមុន។

Luis Suarez បាន​និយាយ​តាម​រយៈ MARCA ថា៖ “ខ្ញុំ​មិន​នឹក​ស្មាន​ថា ពួក​យើង​នឹង​នៅ​ជាមួយ​គ្នា​ម្តង​ទៀត​ទេ (Inter Miami) ព្រោះ​ខ្ញុំ​គិត​ថា Messi នឹង​បញ្ចប់​អាជីព​របស់​គាត់​នៅ Barcelona។ ក្នុង​ឆ្នាំ 2019 យើង​ស្រមៃ​ថា នឹង​បាន​ឈ្នះ​អ្វីៗ​គ្រប់​យ៉ាង​នៅ Barcelona ហើយ​យើង​សុបិន​ចង់​ចូលនិវត្តន៍​នៅ​ទីនោះ។ ដំបូង​​ខ្ញុំ​​បាន​ចាកចេញ ហើយ​បន្ទាប់​មក​ពួកគេ​ទាំងអស់​បាន​ចាកចេញ​តាម​ពី​ក្រោយ​ខ្ញុំ”។

ប្រភព: Sportskeeda