Pep Guardiola ចេញ​មុខ​ការពារ Xavi បន្ទាប់​ពី​មាន​ការ​រិះគន់​លើ​ទម្រង់​លេង និង​ការ​ដឹកនាំ​ក្រុម​នា​រដូវកាល​នេះ

លោក Pep Guardiola បាន​ចេញ​មុខ​ដោយ​ប្រយោល​ក្នុង​ការការពារ​មិត្ត​ល្អ​របស់​គាត់​គឺ​លោក Xavi Hernandez ដោយ​បាន​និយាយ​ថា កីឡាករ​របស់ Barcelona ត្រូវ​តែ​ប្រឹងប្រែង​ឡើង​បន្ថែម​ទៀត បន្ទាប់​ពី​ទម្រង់​លេង​ដ៏​អាក្រក់​របស់​ពួក​គេ ក្នុង​ការ​ប្រកួត​ចាញ់​ក្លឹប Real Madrid ជាមួយ​លទ្ធផល 4-1 កាល​ពី​ប៉ុន្មាន​ថ្ងៃ​មុន។

យ៉ាង​ណា​មិញ Xavi Hernandez កំពុង​មាន​អារម្មណ៍​មិន​សូវ​ល្អ និង​កំពុង​ស្ថិត​ក្នុង​ការ​ចោទប្រកាន់​ពី​រឿង​ដឹកនាំ​ក្រុម​មិន​ជោគជ័យ​នៅ​រដូវកាល​នេះ។ Barcelona ទើប​នឹង​បាត់បង់​ពាន Spain Super Cup កាល​ពី​ពេល​ថ្មីៗ​នេះ ដោយ​ពួក​គេ​បាន​ចាញ់ Real Madrid 4-1 ក្នុង​វគ្គ​ផ្ដាច់ព្រ័ត ខណៈ​ដែល​បច្ចុប្បន្ន ពួក​គេ​កំពុង​ឈរ​នៅ​ចំណាត់​ថ្នាក់​លេខ 4 ក្នុង​ក្របខណ្ឌ La Liga និង​ហាក់​ដូច​ជា​ឃ្លាត​ឆ្ងាយ​ពី​ការ​ប្រជែង​ពាន​លីគ​នៅ​រដូវកាល​នេះ​ផង​ដែរ។

ដោយ​ឡែក​លោក Pep Guardiola ត្រូវ​បាន​គេ​សួរ​អំពី​អតីត​ក្លឹប​របស់​គាត់ (Barcelona) នៅ​ក្នុង​អំឡុង​ពេល​ប្រកាស​ពានរង្វាន់ FIFA’s the Best Awards កាល​ពី​ម្សិលមិញ ហើយ​គ្រូ​បង្វឹក​ឆ្នើម​រូប​នេះ បាន​និយាយ​ថា៖ “ខ្ញុំ​ចង់​ផ្តល់​ការ​គាំទ្រ​ដល់ Xavi របស់​ខ្ញុំ។ ងាយ​ណាស់ ក្នុង​ការ​បន្ទោស​គ្រូ​បង្វឹក ប៉ុន្តែ​កីឡាករ​ត្រូវ​តែ​ឡើង​ជើង។ គ្មាន​អាថ៌កំបាំង​ទេ ពួកគេ​ជា​អ្នក​លេង​នៅ​ក្នុង​ការ​ប្រកួត។ មិន​មែន​អ្វីៗ​គ្រប់​យ៉ាង គឺ​ជា​កំហុស​របស់​គ្រូ​បង្វឹក​ឡើយ។ កីឡាករ​ត្រូវ​តែ​បោះ​ជំហាន​ទៅ​មុខ ប្រសិន​បើ​គ្រូបង្វឹក​នៅ​រហូត​ដល់​ទី​បញ្ចប់ កីឡាករ​ត្រូវ​បង្ហាញ​ពី​គុណភាព​របស់​ពួក​គេ”។

ប្រភព: Barcablaugranes