បាល់ទាត់អន្តរជាតិ
Bayern Munich ចាប់អារម្មណ៍ចង់បានខ្សែការពារស្ដាំ Kieran Trippier
ក្លឹប Bayern Munich ត្រូវបានគេរាយការណ៍ថា បានចាប់អារម្មណ៍ក្នុងការចុះហត្ថលេខាលើខ្សែការពារស្តាំរបស់ក្លឹប Newcastle United គឺកីឡាករ Kieran Trippier នៅក្នុងអំឡុងពេលនៃទីផ្សារដោះដូរកីឡាករនាខែមករានេះ។
ជាការពិតណាស់ គ្មានការលាក់បាំងអ្វីឡើយ ដោយកាលពីដើមខែនេះ គ្រូបង្វឹករបស់ក្លឹបលោក Thomas Tuchel បានបង្ហាញជាសាធារណៈថា គាត់ចង់ចុះហត្ថលេខាលើខ្សែការពារស្តាំម្នាក់ មុនពេលនៃទីផ្សារដោះដូរកីឡាករក្នុងលីគកំពូលនៃប្រទេសអាឡឺម៉ង់បិទ នាថ្ងៃទី 1 ខែកុម្ភៈ ខាងមុខ។
កាលពីដើមរដូវកាលកន្លងទៅ Bayern Munich បានព្យាយាមចុះហត្ថលេខាលើ Kyle Walker របស់ Manchester City តែត្រូវបានបរាជ័យ ហើយកីឡាករសញ្ជាតិអង់គ្លេសរូបនេះបានសម្រេចចិត្តបន្តកុងត្រាថ្មីរបស់គាត់រហូតដល់ឆ្នាំ 2026។
យ៉ាងណាមិញ នៅពេលនេះកាសែត Chronicle Live បានអះអាងថា Bayern Munich បានបង្វែរការចាប់អារម្មណ៍របស់ខ្លួនទៅលើខ្សែការពារសញ្ជាតិអង់គ្លេសម្នាក់ទៀតគឺ Kieran Trippier។ ពេលនេះ Bayern Munich សង្ឃឹមថា ពួកគេអាចបញ្ចុះបញ្ចូល Trippier ឲ្យផ្លាស់ទៅទឹកដីអាឡឺម៉ង់ ដោយមានមិត្តរួមជាតិរបស់គាត់ Harry Kane និង Eric Dier នៅទីនោះដែរ។
ប្រភព: Sportsmole