Mikel Arteta ស្រាយ​ការ​សង្ស័យ​ដែល​ថា គាត់​អាច​នឹង​ទៅ​ដឹកនាំ Barcelona ចុង​បញ្ចប់​នៃ​រដូវកាល​នេះ

គ្រូ​បង្វឹក​របស់​ក្លឹប​កាំភ្លើងធំ Arsenal លោក Mikel Arteta បាន​បដិសេធ​ក្នុង​គោលជំហរ​ច្បាស់លាស់ ពាក់ព័ន្ធ​នឹង​របាយការណ៍​ដែល​ផ្សារ​ភ្ជាប់​គាត់​ជាមួយ​នឹង​មុខ​តំណែងជា​គ្រូ​បង្វឹក​ថ្មី​របស់​ក្លឹប​អ្នក​មាន​បុណ្យ Barcelona នៅ​ចុង​បញ្ចប់​នៃ​រដូវកាល​នេះ។ កាល​ពី​ចុង​សប្ដាហ៍​មុន Xavi បាន​ធ្វើ​សេចក្តី​ប្រកាស​ជា​ផ្លូវការណ៍​ថា គាត់​នឹង​ចាកចេញ​ពី Camp Nou នៅ​ចុង​បញ្ចប់​រដូវកាល​ឆាប់ៗ​ខាង​មុខ។

អតីត​វីរបុរស​​របស់​ក្លឹប​លោក Xavi Hernandez បាន​បញ្ជាក់​ថា ថ្វី​ត្បិតតែ​គាត់​ត្រូវ​ចាកចេញ​នៅ​ចុង​បញ្ចប់​នៃ​រដូវកាល​នេះ​ក៏​ដោយ គាត់​នៅ​តែ​ប្តេជ្ញាចិត្ត​ក្នុង​ការ​ដឹកនាំ​ក្រុម​ឲ្យ​បញ្ចប់​ទៅ​ដោយ​ធ្វើ​ឲ្យ Barcelona បញ្ចប់​ចំណាត់​ថ្នាក់​ក្នុង​ចំណោម​ក្រុម​កំពូល​តារាង​ទាំង 4 (Top-4) នៃ​ក្របខណ្ឌ La Liga និង​អាច​មាន​ឱកាស​ឈ្នះពាន UEFA Champions League ឆ្នាំ​នេះ​ផង​ដែរ។

ក្រោយ​ប្រកាស​ពី​គម្រោង​ចាកចេញ​របស់ Xavi Hernandez មាន​គ្រូ​បង្វឹក​ជា​ច្រើន​បាន​ផ្សារ​ភ្ជាប់​ជាមួយ​នឹង​ការ​ទៅ​ដឹកនាំ​នៅ Barcelona។ ដូចគ្នា​នេះ​ដែរ របាយការណ៍​មួយ​កាល​ពី​ចុងសប្តាហ៍​ក្នុង​ប្រទេស​អេស្ប៉ាញ​បាន​បង្ហាញ​ថា Arteta ដែល​បច្ចុប្បន្ន​ជា​គ្រូ​បង្វឹក​របស់​ក្លឹប​កាំភ្លើងធំ កំពុង​ពិចារណា​ដើម្បី​ចាកចេញ​ពី Emirates ទៅ​ជំនួស​តំណែង​របស់ Xavi នៅ Barcelona ដែល​ធ្លាប់​ជា​អតីត​ក្លឹប​ចាស់​របស់​គាត់។

យ៉ាង​ណា​មិន​យូរ​ប៉ុន្មាន​លោក Mikel Arteta បាន​បដិសេធ​លើ​ការ​អះអាង​បែប​នេះ ដោយ​​គាត់​បាន​និយាយ​ទៅ​កាន់​ប្រព័ន្ធ​ផ្សព្វផ្សាយ​មុន​ការ​ប្រកួត Premier League ទល់​នឹង​ក្លឹប Nottingham Forest ថា៖ “ព័ត៌មាន​ខ្ញុំ​ជាមួយ Barcelona គឺ​ក្លែងក្លាយ​ទាំង​ស្រុង។ នោះ​​ជា​​ព័ត៌មាន​មិន​ពិត​ទាល់តែ​សោះ… ខ្ញុំ​កំពុង​នៅ​កន្លែង​ដែល​ត្រឹមត្រូវ​ជាមួយ​មនុស្ស​ដែល​ត្រឹមត្រូវ ហើយ​មាន​អារម្មណ៍​ល្អ​ណាស់​”។

ប្រភព: Sportsmole