បាល់ទាត់អន្តរជាតិ
Szoboszlai នឹងខកខានការប្រកួតទល់នឹង Arsenal យប់នេះ!!!
ខ្សែបម្រើ Dominik Szoboszlai របស់ក្លឹបហង្សក្រហម Liverpool ត្រូវបានគេដឹងថា នឹងអវត្តមានពីក្រុមរបស់ខ្លួនសម្រាប់ការប្រកួត Premier League របស់ពួកគេនៅយប់នេះ (ម៉ោង 11:30) ដែលត្រូវតទល់នឹងក្លឹបកាំភ្លើងធំ Arsenal។
យ៉ាងណាមិញ ក្រុមរបស់លោក Jurgen Klopp នឹងត្រូវប្រកួតដ៏ស្វិតស្វាញនៅទឹកដី Emirates ដោយសង្ឃឹមថា នឹងអាចទទួលបាន 3 ពិន្ទុ ដើម្បីមានគម្លាតនាំមុខកាន់តែឆ្ងាយទៅលើក្រុមលេខ 2 Manchester City។ ទន្ទឹមនឹងនេះដែរ Arsenal ដែលជាក្រុមម្ចាស់ផ្ទះ ក៏ចង់បាន 3 ពិន្ទុដូចគ្នា ដើម្បីដណ្ដើមតំណែងឈរនៅចំណាត់ថ្នាក់លេខ 2 បណ្ដោះអាសន្ន និងមានក្ដីសង្ឃឹមក្នុងការបន្តដំណើរទៅកាន់ការប្រជែងពាន Premier League រដូវកាលនេះ។
ដោយឡែកសម្រាប់ខ្សែបម្រើ Szoboszlai បានខកខានការប្រកួតសម្រាប់ Liverpool ចំនួន 4 ប្រកួតមកហើយ ដោយសារបញ្ហារបួសសរសៃពួរក្នុងថ្ងៃចូលឆ្នាំសកល ដែលជាការប្រកួតទល់នឹង Newcastle United ប៉ុន្តែខ្សែបម្រើរូបនេះ បានត្រឡប់មកវិញជាមួយនឹងការប្រកួតដែលហង្សក្រហមបានយកឈ្នះទៅលើ Norwich City ក្នុងលទ្ធផល 5-2 នៃការប្រកួត FA Cup កាលពីចុងខែមុន។
ទោះជាយ៉ាងណាក៏ដោយរបាយការណ៍ពី Anfield Talk បានអះអាងថា Szoboszlai នឹងមិនមានឈ្មោះនៅក្នុងការប្រកួតទល់នឹង Arsenal ថ្ងៃនេះឡើយ ដោយមិនទាន់មានហេតុផលបញ្ជាក់ច្បាស់លាស់នៅឡើយទេ។ អតីតកីឡាកររបស់ក្លឹប RB Leipzig រូបនេះ គឺជាចំណែកមួយដ៏សំខាន់របស់ក្លឹបហង្សក្រហម ស្របពេលដែលគាត់ជាខ្សែបម្រើដែលមានទេពកោសល្យអាចស៊ុតបញ្ចូលទីបានយ៉ាងល្អផងដែរ។
ប្រភព: Sportsmole