អ្នកគាំទ្រ​នឹង​ទទួល​បាន​ប្រាក់​សំណង 50% វិញ សម្រាប់​ការ​ប្រកួត​របស់ Inter Miami នៅ​ហុងកុង ដោយ​សារ Messi មិន​បាន​ចូល​លេង

អ្នក​រៀបចំ​ការ​ប្រកួត​មិត្តភាព​រវាង​ក្លឹប Inter Miami ជាមួយ Hong Kong All Stars នឹង​បង្វិល​សង​ប្រាក់​ដល់​អ្នក​ទិញ​សំបុត្រ​ទស្សនា​ការ​ប្រកួត 50% វិញ ដោយ​សារ​តែ​ការ​អវត្តមាន​របស់​ខ្សែប្រយុទ្ធ​អាហ្សង់ទីន Lionel Messi។ យ៉ាង​ណា​មិញ​នៅ​ក្នុង​ការ​ប្រកួត​នោះ Inter Miami បាន​យក​ឈ្នះ Hong Kong All Stars ក្នុង​លទ្ធផល 4 ទល់​នឹង 1 តែ Messi មិន​បាន​បង្ហាញ​ខ្លួន​នៅ​ក្នុង​ប្រកួត​នោះ​ឡើយ ដោយ​គាត់​នៅ​ជា​កីឡាករ​បម្រុង​រហូត​ដល់​ចប់​ការ​ប្រកួត។

យោងតាម​សេចក្ដី​ប្រកាស​របស់​គណៈកម្មការ​នៃ​ការ​ប្រកួត​បាន​លើក​ឡើង​ថា៖ “យើង​ត្រូវ​បាន​ជូន​ដំណឹង​ដោយ Inter Miami ថា Messi និង Suarez មិន​អាច​លេង​បាន​ដោយ​សារ​របួស។ យ៉ាង​ណា​យើង​នឹង​មិន​គេច​ពី​ការ​ទទួល​ខុស​ត្រូវ​ឡើយ ក្នុង​នាម​ជា​អ្នករៀបចំ​កម្មវិធី ហើយ​នោះជា​មូលហេតុ​ដែល យើង​នឹង​ផ្តល់​ជូន​អ្នក​ទាំង​អស់​ដែល​បាន​ទិញ​សំបុត្រ​ប្រកួត​នូវ​ការ​បង្វឹល​ទឹក​ប្រាក់ 50% វិញ”។

គួរ​ដឹង​ផង​ដែរ​ថា មាន​អ្នក​ទស្សនា​ចំនួន 38,000 នាក់ បាន​ទិញ​សំបុត្រ​នៃ​ការ​ទស្សនា​ការ​ប្រកួត ហើយ​តម្លៃ​នៃ​សំបុត្រ​មាន​តម្លៃ​ចាប់​ពី 115 អឺរ៉ូ​ឡើង​ទៅ។ ក្រោយ​ចប់​ការ​ប្រកួត រដ្ឋាភិបាល​ហុងកុង​ទាមទារ​ឲ្យ Inter Miami ពន្យល់​ពី​មូលហេតុ​ដែល Messi មិន​ចូល​លេង ហើយ​ក្លឹបអាមេរិក Inter Miami បាន​ប្រាប់​ថា ខ្សែប្រយុទ្ធ​របស់​ខ្លួន​របួស ហើយ​​ក៏​បាន​សុំទោស​អ្នកគាំទ្រ​ពី​រឿង​នេះ​ផង​ដែរ។

ប្រភព: Telecomasia