Vinicius Jr សង្ឃឹម​ថា ប្រធាន​ក្លឹប Real Madrid នឹង​មិន​លក់​គាត់​ទៅ​ឲ្យ Man United

ខ្សែប្រយុទ្ធ​ឆ្នើម Vinicius Junior បាន​និយាយ​ថា គាត់​រីករាយ​ក្នុង​ជីវិត​បាល់ទាត់​បច្ចុប្បន្ន​នៅ Real Madrid ហើយ​សង្ឃឹម​ថា ប្រធាន​ក្លឹប​លោក Florentino Perez នឹង​អនុញ្ញាត​ឲ្យ​គាត់​ស្នាក់​នៅ​ទីនេះ​រយៈពេល​ជា​ច្រើន​ឆ្នាំ​បន្ត​ទៀត។

យ៉ាងណា​មិញ​កីឡាករ​សញ្ជាតិ​ប្រេស៊ីល​រូបនេះ​បាន​ខកខាន​ការ​ប្រកួត​ទល់​នឹង​ក្លឹប Atletico Madrid កាល​ពី​ចុង​សប្តាហ៍​មុន ដែល​ជា​ការ​ប្រកួត​ក្នុង​ក្រប​ខ័ណ្ឌ La Liga ដោយ​សារ​បញ្ហាក ប៉ុន្តែ​គាត់​បាន​ត្រឡប់​មក​ចូល​លេង​ធម្មតា​វិញ ក្នុង​ការ​ប្រកួត​កាល​ពី​រំលង​អាធ្រាត​យប់​មិញ​ជាមួយ Girona។

ទោះ​បី​ជា​ទើប​ត្រឡប់​ចូល​ទីលាន​វិញ​ក៏​ដោយ Vinicius Jr បាន​បង្ហាញ​ទម្រង់​លេង​ដ៏​លេច​ធ្លោរ​ដដែល​ទល់​នឹង Girona ដោយ​ស៊ុតបញ្ចូល​ទី​បាន 1 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​ចំនួន 2 ដង។ នៅ​រដូវកាល​នេះ គាត់​រក​បាន​គ្រាប់​បាល់​សរុប 12 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 7 ដង ក្នុង​ការ​បង្ហាញ​ខ្លួន​ចំនួន 21 លើក​សម្រាប់ Real Madrid។

កីឡាករ​វ័យ 23 ឆ្នាំ​រូប​នេះ ទើប​តែ​បាន​ចុះ​កុងត្រា​ថ្មី​ជាមួយ Real Madrid កាល​ពី​ខែ​តុលា ឆ្នាំ​មុន ប៉ុន្តែ​ថ្មីៗ​នេះ​មាន​ការ​រំពឹង​ទុក​ជុំវិញ​អនាគត​របស់​គាត់ ស្រប​ពេល​ដែលក្លឹប Real Madrid កំពុង​ត្រៀម​ផ្ទេរ Kylian Mbappe ខណៈ​ដែល​អ្នក​ទាំង 2 សុទ្ធ​តែ​មាន​ជំនាញ​លេង​នៅ​ស្លាប​ឆ្វេង​ដូច​គ្នា។

កាល​ពី​ខែ​មុន មាន​របាយការណ៍​ជា​ច្រើន​បាន​អះអាង​ថា ក្លឹប​បិសាចក្រហម Manchester United កំពុង​តាម​ដាន​លើ Vinicius Jr ហើយ​ពួក​គេ​នឹង​ហ៊ាន​ចាយ​ប្រាក់​យ៉ាង​ច្រើន​ដើម្បី​នាំ​យក​គាត់​ទៅ Old Trafford ប្រសិន​បើ Real Madrid សម្រេច​ចិត្ត​ចែក​ផ្លូវជាមួយ​គាត់។

យ៉ាង​ណា​ក៏​ដោយ Vinicius Jr បាន​បង្ហាញ​ពី​បំណង​ចង់​ស្នាក់​នៅ Bernabeu ឲ្យ​បាន​យូរ​តាម​ដែល​អាច​ធ្វើ​ទៅ​បាន ដោយ​គាត់​បាន​ប្រាប់​អ្នក​សារព័ត៌មានកាល​ពី​ពេល​ថ្មីៗ​នេះ​ថា “ខ្ញុំ​តែង​តែ​រីក​រាយ​ក្នុង​ការ​លេង​នៅ Real Madrid។ ខ្ញុំ​សង្ឃឹម​ថា ប្រធាន​ក្លឹប​នឹង​រក្សា​ទុក​ខ្ញុំ​នៅ​ទីនេះ​បាន​យូរ”។

ប្រភព: Sportsmole