Raheem Sterling បដិសេធ​លុយ​ធំ​ពី​ក្លឹប​នៅ​អារ៉ាប៊ីសាអូឌីត

កីឡាករ​ឆ្នើម Raheem Sterling ត្រូវ​បាន​គេ​រាយការណ៍​ថា បាន​ច្រានចោល​សំណើរ​ជា​ទឹកប្រាក់​ដ៏​ធំ​ចំនួន 900,000 ផោន ក្នុង​មួយ​សប្តាហ៍​ពី​ក្លឹប​នៅ Saudi Pro League កាល​ពី​ដើម​រដូវកាល​កន្លង​ទៅ។ កីឡាករ​ដែល​មិន​ស្រវា​លុយ​ជា​ធំ​រូប​នេះ បាន​ប្ដេជ្ញា​បន្ត​នៅ​ជាមួយ Chelsea ដើម្បី​ឱកាស​ឈ្នះពាន និង​បន្ត​អាជីព​បាល់​ក្នុង​កម្រិត​ខ្ពស់​នៅ​តំបន់​អឺរ៉ុប។

យ៉ាង​ណា​មិញ Raheem Sterling បាន​ចាកចេញ​ពី​ក្រុម​របស់​លោក Pep Guardiola ទៅ Stamford Bridge កាល​ពី​រដូវក្តៅ​ឆ្នាំ 2022 ហើយ​គិត​ចាប់​តាំង​ពី​ពេល​នោះ មក​ទល់​នឹង​ពេល​នេះ Raheem Sterling លេង​បាន​ប្រកួត​សរុប​ឲ្យ​តោខៀវ 70 ប្រកួត​មក​ហើយ ដោយ​ស៊ុត​បញ្ចូលទី​បាន 16 គ្រាប់។

អតីត​ខ្សែ​ប្រយុទ្ធ​របស់​ក្លឹប​ហង្សក្រហម Liverpool រូប​នេះ នៅ​តែ​មាន​ទម្រង់​លេង​ដ៏​ល្អ​នៅ​រដូវកាល​នេះ ដោយ​ស៊ុតបញ្ចូលទី​បាន 5 គ្រាប់ និង​បញ្ជូនបាល់​ឲ្យ​មិត្ត​រួម​ក្រុម​បាន​ចំនួន 3 ដង ដែល​នេះ​ជា​ស្ថិតិ​ដ៏​ល្អ​បំផុត​ក្នុង​ចំណោម​កីឡាករ​ទាំង​អស់​របស់ Chelsea ហើយ​ក៏​ល្អ​ជាង​កីឡាករ​ចំណូល​ថ្មី Cole Palmer ផង​ដែរ។

យោងតាម​សារព័ត៌មាន The Telegraph បាន​ឲ្យ​ដឹង​ថា Sterling មាន​ឱកាស​ចាកចេញ​ពី Chelsea កាលពី​ដើម​រដូវកាល​នេះ ទោះ​បី​ជា​កុងត្រា​របស់​គាត់​ជាមួយ​ក្លឹប​បច្ចុប្បន្ន​នៅ​មាន​សុពលភាព​រហូត​ដល់​ឆ្នាំ 2027 ក៏​ដោយ។ របាយការណ៍​ដដែល​នេះ​ដែរ​បាន​អះអាង​បន្ថែម​ថា កីឡាករ​វ័យ 29 ឆ្នាំ​រូប​នេះ​ត្រូវ​បាន​ក្លឹប​នៅ Saudi Pro League ផ្ដល់​សំណើរ​ជា​ទឹកប្រាក់​រហូត​ដល់ 900,000 ផោន ក្នុង​មួយ​សប្តាហ៍។

ប្រាក់ខែ​បច្ចុប្បន្ន​របស់ Sterling មាន​ចំនួន 300,000 ផោន ក្នុង​មួយ​សប្ដាហ៍ ដូច្នេះ​ហើយ​ទំហំ​ទឹកប្រាក់​នៃ​ការ​ដាក់​សំណើរ​របស់​ក្លឹប​នៅ​អារ៉ាប៊ីសាអូឌីត​គឺ​ច្រើន​ជា​ប្រាក់ខែ​របស់​គាត់​គុណ​នឹង 3។ ទំហំ​ទឹកប្រាក់​នេះ​ដែរ ក៏​អាច​ធ្វើ​ឲ្យ Sterling ក្លាយ​ជា​កីឡាករ​ដែល​រក​បាន​ប្រាក់​ខែ​ខ្ពស់​បំផុយ​ក្នុង​ចំណោម​កីឡាករ​ទាំង 3 រូប​នេះ Saudi Pro League ទៀត​ផង។

ប្រភព: Sportsmole