Barcelona កំពុង​ពិចារណា​ចង់​ចុះ​ហត្ថលេខា​លើ​ខ្សែ​ប្រយុទ្ធ​មួយ​រូប​របស់​ក្លឹប Hull City

ក្លឹប​អ្នក​មាន​បុណ្យ Barcelona ត្រូវ​បាន​គេ​រាយការណ៍​ថា កំពុង​ពិចារណា​លើ​ការ​ផ្ទេរ​មួយ​សម្រាប់​ខ្សែប្រយុទ្ធ Jaden Philogene របស់​ក្លឹប Hull City នៅ​ក្នុង​អំឡុង​ពេល​នៃ​ទីផ្សារដោះដូរ​កីឡាករ​នា​រដូវក្តៅ​ខាង​មុខ។ កីឡាករ​វ័យ 22 ឆ្នាំ​រូបនេះ បាន​គឺ​ជា​កីឡាករ​ដែល​ប្រសូត្រ​ចេញ​ពី​ថ្នាល​យុវជន​របស់​ក្លឹប Aston Villa និង​ត្រូវ​បាន​ប្រូម៉ូត​ឡើង​មក​លេង​ជា​មួយ​ក្រុម​ឈុត​ធំ​លើក​ដំបូង​ក្នុង​ឆ្នាំ 2021 ប៉ុន្តែ​ពេល​នោះ​គាត់​បាន​បង្ហាញ​ខ្លួន​ត្រឹមតែ 6 ប្រកួត​ប៉ុណ្ណោះ​សម្រាប់​ក្លឹប មុនពេល​ចាកចេញ។

បន្ត​ពី​នោះ​មក Jaden Philogene បាន​ចំណាយ​ពេល​ខ្ចី​ជើង​នៅ​ក្លឹប Stoke City និង Cardiff City ប៉ុន្តែ​គាត់​ត្រូវ​បាន Hull City ទិញ​ផ្ដាច់​កុងត្រា​នា​រដូវក្តៅ​ឆ្នាំ​មុន។ ខ្សែប្រយុទ្ធ​រូបនេះ​មាន​ទម្រង់​លេង​ដ៏​ល្អ​ពេល​ក្លាយ​ជា​កីឡាករ​របស់ Hull City ដោយ​កាល​ពី​រដូវកាល​មុន (2023-2024) គាត់​បាន​ស៊ុត​បញ្ចូល​ទី​បាន 12 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 6 ដង ពី​ការ​បង្ហាញ​ខ្លួន​សរុប 32 លើក ក្នុង​ក្របខ័ណ្ឌ Championship របស់​អង់គ្លេស។

Philogene នៅ​មាន​កុងត្រា​ជាមួយ Hull City រហូត​ដល់​ខែ​មិថុនា ឆ្នាំ 2026 ប៉ុន្តែ​មាន​ការ​រំពឹង​ទុក​ថា គាត់​អាច​នឹង​ចាកចេញ​ក្នុង​ទីផ្សារ​ដោះដូរ​កីឡាករ​រដូវក្តៅ​នេះ។ យោងតាម​របាយការណ៍​ពី ​​Relevo បាន​ឲ្យ​ដឹង​ថា ក្លឹប Barcelona ចាត់​ទុក Philogene ជា​ជម្រើស​ដែល​អាច​ទិញ​បាន ប្រសិន​បើ​ពួក​គេ​បរាជ័យ​មិន​អាច​ចុះ​ហត្ថលេខា​លើ Nico Williams របស់​ក្លឹប Athletic Bilbao បាន​ទេ។ ដូច្នេះ Philogene គឺ​ជា​ជម្រើស​ខ្សែ​ប្រយុទ្ធ​ទី 2 នៅ​ក្នុង​ភ្នែក​របស់ Barcelona បន្ទាប់​ពី Nico Williams។

ប្រភព: Sportsmole