Diogo Dalot អាច​នឹង​ស្នង​តំណែង​អាវ​លេខ 7 របស់ Cristiano Ronaldo

ខ្សែការពារ Diogo Dalot របស់​ក្លឹប​បិសាចក្រហម ត្រូវ​បាន​គេ​ប្រទះឃើញ​ពាក់​អាវ​លេខ 7 ដែល​ជា​លេខ​របស់ Cristiano Ronaldo នៅ​ក្នុង​អំឡុង​ពេល​ហ្វឹកហាត់​នៅ​ទីក្រុង Perth ខណៈ​ដែល Ronaldo បាន​អវត្តមាន​ពី​ការ​ប្រកួត​មិត្តភាព​មុន​បើក​រដូវកាល​របស់ Manchester United ស្ទើរ​តែ​ទាំង​អស់​ទៅ​ហើយ ដោយ​ហេតុផល​បញ្ជាក់​ថា “ជាប់​កាតព្វកិច្ច​​គ្រួសារ”។

Dalot ដែល​ជា​ម្ចាស់​អាវ​លេខ 20 បែរ​ជា​សុខៗ​ក៏​ប្ដូរ​មក​ពាក់​អាវ​លេខ 7 ដែល​ធ្វើ​ឲ្យ​គេ​សន្និដ្ឋាន​កាន់​តែ​ច្បាស់​ថា Cristiano Ronaldo នឹង​ចាកចេញ​ពី​ក្លឹប​នៅ​រដូវក្ដៅ​នេះ។ ទោះ​បី​មិនមាន​ការ​ប្រែប្រួល​ពី​ស្ថានភាព​របស់ Ronaldo អស់​រយៈពេល​ប្រហែល 3 សប្តាហ៍​មក​ហើយ​ក៏​ដោយ កាសែត The Mail បាន​អះអាង​ថា ភ្នាក់​ងារ​របស់​ខ្សែ​ប្រយុទ្ធ​រូប​នេះ គឺ​លោក Jorge Mendes កំពុង​ព្យាយាម​ទាក់​ទង​ទៅក្លឹបផ្សេង ដើម្បី​ដំណើរ​ការ​ផ្ទេរ​តាម​ដែល​អាច​ធ្វើ​បាន។ មក​ដល់ថ្ងៃ​នេះ មិន​ទាន់​មាន​ក្លឹប​ណា​ទទួល​យក តារា​ឆ្នើម Cristiano Ronaldo ឡើយ។

ប្រសិន​បើ Cristiano Ronaldo ចាកចេញ សំណួរ​សួរ​ថា​តើ Diogo Dalot អាច​នឹង​ពាក់​អាវ​លេខ 7 ជា​លេខ​ថ្មី​របស់​ខ្លួន​បាន​ទេ?

ប្រាកដ​ណាស់ Cristiano Ronaldo និង Diogo Dalot មិន​ត្រឹម​តែ​ជា​មិត្ត​រួម​ក្រុម​នៅ​បិសាចក្រហម​​ប៉ុណ្ណោះ​ទេ កីឡាករ​ទាំង​ពីរ​នេះក៏​ជា​មិត្ត​រួម​ក្រុម​ជម្រើស​ជាតិ​ព័រទុយហ្គាល់​ជា​មួយ​គ្នា​ផងដែរ។ Diogo Dalot ពិត​ជា​សាកសម​នឹង​ទទួល​អាវ​លេខ 7 របស់ Cristiano Ronaldo បាន។

ប្រសិន​បើ Diogo Dalot ដែល​លេង​តំណែង​ជា​ខ្សែការពារ​ស្លាប អាច​គ្រង​អាវ​លេខ 7 មែន​នោះ​គឺ​ស្រដៀង​គ្នា​នឹង​ក្លឹប​ជា​គូ​ប្រជែង​របស់​ខ្លួន Manchester City ដែរ ដោយ​ពួក​គេ​ទើបតែ​បាន​ប្រគល់​អាវ​លេខ 7 ទៅ​ឲ្យ​ខ្សែការពារ Joao Cancelo។

ប្រភព: Unitedinfocus