Cristian Romero ប្រាប់​ឈ្មោះ​ខ្សែការពារ​ពីរ​រូប​ដែល​គាត់​គិត​ថា​ល្អ​បំផុត​នៅ Premier League

ខ្សែការពារ​កណ្តាល​របស់​ក្លឹប​មាន់ខ្នាយមាស Tottenham Hotspur គឺ​កីឡាករ Cristian Romero បាន​ប្រាប់​ឈ្មោះ​ខ្សែការពារ​ពីរ​រូប​មាន Virgil van Dijk របស់ Liverpool និង​កីឡាករ Lisandro Martinez របស់ Manchester United ដោយ​លើក​ឡើង​ថា គេ​ជា​ខ្សែការពារ​ល្អ​បំផុត​នៅ​ក្នុង​ក្របខ័ណ្ឌ Premier League នាពេល​បច្ចុប្បន្ន។

ថ្លែង​នៅ​ក្នុង​បទសម្ភាសន៍​ជាមួយ Sky Sports (តាមរយៈ Mundo Albiceleste) ខ្សែការពារ Romero បាន​និយាយ​ថា៖ “បច្ចុប្បន្ន​នេះ​ខ្សែការពារ​ល្អ​បំផុត​សម្រាប់​ខ្ញុំ​តែងតែ​ជា Virgil van Dijk ជានិច្ច ហើយ​ម្នាក់​ទៀត​គឺ Lisandro Martinez របស់​ក្លឹប​បិសាចក្រហម Manchester United។ ពួក​គេ​គឺ​ល្អ​បំផុត​នៅ Premier League”។

យ៉ាង​ណា​វា​មិន​គួរ​ឲ្យ​ភ្ញាក់​ផ្អើល​ឡើយ​ដែល Cristian Romero បាន​ជ្រើសរើស Lisandro Martinez ជា​ខ្សែការពារ​ឆ្នើម ព្រោះ​ពួក​គេ​ជា​ដៃគូ​លេង​នៅ​តំបន់​ការពារ​កណ្ដាល​ជា​មួយ​គ្នា នៅ​ក្នុង​ក្រុម​​ជម្រើសជាតិ​​អាហ្សង់ទីន។ អ្នក​ទាំង​ពីរ​គឺ​ជា​ផ្នែកមួយ​នៃ​ការ​នាំ​ក្រុម​ជម្រើស​ជាតិ​របស់​ខ្លួន​ឲ្យ​ឈ្នះពាន​រង្វាន់ Copa America កាល​ពី​ឆ្នាំមុន និង​ពាន Finalissima កាល​ពី​រដូវក្តៅ​កន្លង​ទៅ​នៅ​កីឡដ្ឋាន Wembley។

ជាមួយ​គ្នា​នេះ​ដែរ ប្រសិន​បើ​គ្មាន​បញ្ហា​របួស​ណា​មួយ​កើតឡើង​ទេ​នោះ Lisandro Martinez និង Cristian Romero នឹង​ត្រូវ​ធ្វើ​ដំណើរ​ជាមួយ​ក្រុម​ជម្រើស​ជាតិ​អាហ្សង់ទីន​ជា​ថ្មី​ម្ដង​ទៀត សម្រាប់​ការ​ប្រកួត FIFA World Cup ឆ្នាំ 2022 នៅ​ប្រទេស​កាតា។

ប្រភព: Sportskeeda