ខ្សែការពារ Cristian Romero នឹង​អវត្តមាន​ពី​លើ​ទីលាន​ប្រកួត 5 សប្តាហ៍

គ្រូ​បង្វឹក​របស់​ក្លឹប​មាន់ខ្នាយ​មាស Tottenham Hotspur លោក Ange Postecoglou បាន​បង្ហាញ​ការ​ខក​ចិត្ត​យ៉ាង​ខ្លាំង ទាក់ទង​នឹង​ខ្សែការពារ Cristian Romero ដែល​ត្រូវ​អវត្តមាន​ពី​លើ​ទីលាន​ប្រកួត​រហូត​ដល់ 5 សប្តាហ៍​ជាមួយ​នឹង​របួស​សរសៃ​ពួរ។

កីឡាករ​សញ្ជាតិ​អាហ្សង់ទីន​រូប​នេះ ត្រូវ​បាន​ប្ដូរ​ចេញ​នៅ​ពាក់​កណ្តាល​តង់ ក្នុង​ការ​ប្រកួត​ដែល​ក្រុម​របស់​ខ្លួន​បាន​យក​ឈ្នះ 2-1 ទៅ​លើ Everton ជា​ការ​ប្រកួត​ក្នុង​ក្របខណ្ឌ Premier League កាល​ពី​ថ្ងៃសៅរ៍​សប្ដាហ៍​មុន។ ដូច្នេះ Romero ត្រូវ​បាន​គេ​រំពឹង​ថា នឹង​ខកខាន​ការ​ប្រកួត​ទល់​នឹង Brighton នៅ​ចុង​ឆ្នាំ​នេះ។

ទន្ទឹម​នឹង​នេះ​ដែរ Tottenham Hotspur នឹង​លេង​ដោយ​គ្មាន​ខ្សែការពារ​សំខាន់​ម្នាក់​ទៀត​ផង​ដែរ​គឺ Micky van de Ven ដែល​កំពុង​មាន​បញ្ហា​សរសៃពួរ​ដូចគ្នា។ Postecoglou បាន​ប្រាប់​អ្នក​យក​ព័ត៌មាន​កាល​ពី​ពេល​ថ្មីៗ​នេះ​ថា “វា​មិន​ជា​ខ្លាំង​ក្លា​ប៉ុន្មាន​ទេ​សម្រាប់ Romero គាត់​បាន​ស្កែន​មើល​របួស​នៅ​ថ្ងៃ​មុន ហើយ​គាត់​មាន​បញ្ហា​សរសៃពួរ។ ដូច្នេះ​យើង​ប្រហែល​ជា​ឲ្យ​គាត់​សម្រាក​ព្យាបាល 4 សប្តាហ៍ រឺ 5 សប្តាហ៍”។

ប្រភព: Sportsmole