Chelsea និង Liverpool ដាក់​គោលដៅ​ចង់​បាន Declan Rice

ប្រធាន​ក្រុម​របស់​ក្លឹប​ញញួរធំ West Ham United គឺ​ខ្សែបម្រើ Declan Rice កំពុង​ឈរ​លើ​គោល​ដៅ​នៃ​ការ​ចង់​បាន​ពី​ក្លឹប​តោខៀវ Chelsea និង​ក្លឹប​ហង្សក្រហម Liverpool ដែល​ក្លឹប​ទាំង​ពីរ​នេះ​នឹង​ដំណើរ​ការ​ផ្ទេរ ក៏​ដូច​ជា​ការ​ដេញ​ថ្លៃ​នៅ​ខែ​មករា ឆ្នាំ​2023។

យ៉ាង​ណា​មិញ​កីឡាករ​សញ្ជាតិ​អង់គ្លេស​រូបនេះ​ត្រូវ​បាន​ផ្សារភ្ជាប់​ជាមួយ​នឹង​ផ្ទេរ​ចេញ​ពី​ក្លឹប​ញញួរធំ​ជាយូរ​មក​ហើយ និង​មាន​ក្លឹប​ជា​ច្រើន​ចង់​បាន​គាត់។ Chelsea ជា​ក្លឹប​ដែល​មាន​ទំនាក់ទំនង​​ខ្លាំង​បំផុត​ជាមួយ Declan Rice ក្នុង​រយៈពេល 12 ទៅ 18 ខែ​កន្លង​មក​នេះ។

របាយការណ៍​កាល​ពី​ខែ​មិថុនា​កន្លង​ទៅ បាន​បង្ហាញ​ថា ប្រធាន​ក្លឹប​លោក Todd Boehly បាន​និយាយ​ជា​មួយ​ក្លឹប West Ham អំពី Declan Rice និង​តម្លៃ​ផ្ទេរ​សម្រាប់​ខ្សែ​បម្រើ​រូប​នេះ។ ទោះ​ជា​យ៉ាង​ណា West Ham បាន​ឆ្លើយ​តប​យ៉ាង​ខ្លី​ថា កីឡាករ​​វ័យ 23 ឆ្នាំ​រូប​នេះ​មិន​មែន​សម្រាប់​លក់​ឡើយ។

ដូចគ្នា​នេះ​ដែរ ក្លឹប​ហង្សក្រហម Liverpool គឺ​ជា​ក្លឹប​ដែល​កំពុង​មាន​វិបត្តិ​កីឡាករ​របួស​ជា​ច្រើន បូក​រួម​ទាំង​ទម្រង់​លេង​ធ្លាក់​ចុះ​យ៉ាង​ខ្លាំង។ គ្រូ​បង្វឹក​លោក Jurgen Klopp ដឹង​ច្បាស់​ថា ក្លឹប​របស់​លោក​ខ្សោយ​នៅ​តំបន់​បម្រើ និង​ព្យាយាម​នាំ​យក​ខ្សែ​បម្រើ​ម្នាក់ រឺ​ពីរ​នាក់​ដែល​មាន​គុណភាព​ល្អ​ជា​ចាំ​បាច់ ហើយ Declean Rice គឺ​បេក្ខភាព​ដ៏​សាកសម​បំផុត។

លោក David Moyes ដែល​ជា​គ្រូបង្វឹក​របស់​ក្លឹប​ញញួរ​ធំ ធ្លាប់​បាន​និយាយ​ថា តម្លៃ​របស់ Declan Rice នឹង​លើស​ពី 120 លានផោន ប៉ុន្តែ​ក្លឹប​មិនមាន​ចេតនា​អនុញ្ញាត​ឲ្យ​គាត់​ចាកចេញ​ទៅ​ក្លឹប​ផ្សេង​ទេ។ យ៉ាង​ណា West Ham មិន​មែន​ជា​ក្លឹប​នៅ​ក្នុង​ក្ដី​ស្រមៃ​នៃ​ការ​លើក​ពាន​ឡើយ ដូច្នេះ​ខ្សែ​បម្រើ​ឆ្នើម​សញ្ជាតិ​អង់គ្លេស​រូប​នេះ អាច​នឹង​ពិចារណា​ចាកចេញ​ទៅ​ក្លឹប​ធំៗ​ដែល​ចង់​បាន​រូប​គាត់។

ប្រភព: 90 Min