អតីត​កីឡាករ​របស់​តោខៀវ Asmir Begovic លើក​ឡើង​ថា បើ​ជ្រុល​ជាចាយ​ជាង 100 លានផោន​ទៅ​ហើយ ក្លឹប​មិន​គួរ​ចុះ​ហត្ថលេខា​លើ Caicedo ទេ

អតីត​អ្នកចាំទី​របស់​ក្លឹប​តោខៀវ Chelsea លោក Asmir Begovic បាន​មើល​ឃើញ​ថា Declan Rice របស់​ក្លឹប​កាំភ្លើងធំ Arsenal ជា​ខ្សែ​បម្រើ​ដែល​តោខៀវ Chelsea គួរ​តែ​ចុះហត្ថលេខា​មក Stamford Bridge នៅ​រដូវក្ដៅ​នេះ ជំនួស​ឲ្យ​ការនាំ​យក Moises Caicedo ពី​ក្លឹប Brighton។

យ៉ាង​ណា​មិញ Asmir Begovic បាន​និយាយ​បែប​នេះ ខណៈ​ពេល​ដែល​មាន​ការ​ជជែក​វែកញែក​មួយ​ពី​យុទ្ធសាស្ត្រ​ផ្ទេរ​របស់ Chelsea។ Asmir Begovic បាន​សង្កត់​ធ្ងន់​ថា តោខៀវ​បាន​ធ្វើ​ខុស​ដោយ​ការ​ចុះ​ហត្ថលេខា​លើ Caicedo ក្នុង​អំឡុង​ពេល​ទីផ្សារ​ដោះដូរ​កីឡាករ​ដែល​ទើប​នឹង​បញ្ចប់​ទៅ​ថ្មីៗ​នេះ។

សូម​រំលឹក​ផង​ដែរ​ថា Chelsea ធ្លាប់​បាន​ទាក់ទង​ទៅ​កាន់ Declan Rice មុន​ពេល​ដែល​គាត់​បាន​ចូលរួម​ជាមួយ Arsenal។ ក្រុម​របស់​លោក Mauricio Pochettino នៅ​ទីបំផុត​បាន​ចុះហត្ថ​លេខា​លើ Caicedo ក្នុង​តម្លៃ 115 លានផោន ដែល​ជា​តម្លៃ​លើស Arsenal ផ្ទេរ Declan Rice ទៅ​ទៀត។

ថ្លែង​នៅ​លើ​ផតឃេស្ថ៍ The Byline កាល​ពី​ពេល​ថ្មីៗ​នេះ Asmir Begovic បាន​និយាយ​ថា៖ “ប្រសិន​បើ​អ្នក​អាច​ចំណាយ 115 លានផោន​លើ Caicedo អ្នក​ប្រាកដ​ជា​អាច​ចំណាយ 120 លានផោន​លើ Declan Rice? ខ្ញុំ​មិន​ដឹង​រឿង​ផ្ទាល់​ខ្លួន​របស់ Declan Rice ទេ ខ្ញុំ​មិន​និយាយ​ថា គាត់​មិន​ចង់​លេង​ឲ្យ Arsenal ទេ ប៉ុន្តែ​ខ្ញុំ​ជឿ​ថា គាត់​ចង់​ទៅ Chelsea”។

Asmir Begovic បាន​បន្ថែម​ទៀត​ថា៖ “ខ្ញុំ​មិន​និយាយ​ថា ខ្ញុំ​មិន​ចូលចិត្ត Enzo Fernandez ទេ ប៉ុន្តែ​ប្រសិន​បើ​យើង​នឹង​ចំណាយ​ប្រាក់ 230 លានផោន​លើ​គាត់ និង Caicedo នោះ ខ្ញុំ​ចង់​ឲ្យ​ចាយលើ Declan Rice ជាង​កីឡាករ​ទាំង​ពីរ​នោះ…។ សូម​យក​កីឡាករ​ល្អ​បំផុត​ចូល​មក​ក្នុង​ក្រុម”។

ប្រភព: Dailypost NG