អាឡឺម៉ង់​ហាល​អាវ​ត្រឹម​វគ្គ​ចែក​ពូល ទោះ​បី​ឈ្នះ 4-2 ទៅ​លើ​កូស្តារីកា​ក៏​ដោយ

ក្រុម​ជម្រើស​ជាតិ​ឥន្ទ្រីយ៍​ដែក​អាឡឺម៉ង់​បាន​ធ្លាក់​ចេញ​ពី World Cup ត្រឹម​វគ្គ​ចែក​ពូល​កាល​ពី​រំលង​អាធ្រាត​យប់​មិញ​នេះ បើ​ទោះ​បី​ជា​ពួក​គេ​បាន​ធ្វើ​ការ​ប្រកួត​យក​ឈ្នះ 4-2 ទៅ​លើ​ក្រុម​ជម្រើស​ជាតិ​កូស្តារីកា​ក៏​ដោយ ព្រោះ​នៅ​ក្នុង​ពូល​ជា​មួយ​គ្នា​នោះ​ជប៉ុន បាន​យក​ឈ្នះ​អេស្ប៉ាញ 2-1 ដើម្បី​ឡើង​ទៅ​ឈរ​នៅ​កំពូល​តារាង។ ថ្វី​ត្បិត​តែ​អាឡឺម៉ង់ និង​អេស្ប៉ាញ មាន 4 ពិន្ទុ​ស្មើ​គ្នា​ពិត​មែន ប៉ុន្តែ​គិត​ផល​សង​គ្រាប់​បាល់ ពួក​គេ​មាន​គ្រាប់​បាល់​តិច​ជាង​អេស្ប៉ាញ​រហូត​ដល់ 3 គ្រាប់។

យ៉ាង​ណា​មិញ​គ្រាប់​បាល់ 4 គ្រាប់​របស់​អាឡឺម៉ង់ គឺ​ជា​ការ​ស៊ុត​បញ្ចូលទី​របស់ Serge Gnabry, Kai Havertz (2 គ្រាប់) និង Niclas Fullkrug។ ដោយ​ឡែក​ក្រុម​ជម្រើស​ជាតិ​កូស្តារីកា ក៏​ត​ដៃ​វិញ​បាន 2 គ្រាប់​ដែរ ដែល​ស៊ុត​បញ្ចូលទី​ដោយ Yeltsin Tejeda និង Juan Pablo Vargas។

គួរ​រំលឹក​ផង​ដែរ​ថា ចាប់​តាំង​ពី​ក្រុម​ជម្រើស​ជាតិ​អាឡឺម៉ង់​បាន​លើក​ពាន World Cup កាល​ពី​ឆ្នាំ 2014 មក ក្នុង​ការ​ប្រកួត 2 លើក​ចុងក្រោយ​នៅ​ឆ្នាំ 2018 និង 2022 ពួក​គេ​មិន​ដែល​ឆ្លង​ផុត​វគ្គ​ចែកពូល​ឡើយ។ ទន្ទឹម​នឹង​នេះ​ដែរ សម្រាប់​ការ​ប្រកួត​វគ្គ 16 ក្រុម​ចុងក្រោយ​អេស្ប៉ាញ​នឹង​ត្រូវ​ប៉ះ​ជាមួយ​ម៉ារ៉ុក ខណៈ​ដែល​ជប៉ុន ត្រូវ​ប្រកួត​ជាមួយ​ក្រុម​ជម្រើស​ជាតិ​ក្រូអាត។

អត្ថបទ​ដោយ: ជូលី