មិន​លាក់បាំង!!! ប្រធាន​ក្លឹប PSG ប្រាប់​ពី​បំណង​ចង់​​ចុះ​ហត្ថលេខា​លើ Jude Bellingham

ថ្មីៗ​នេះ​ប្រធាន​ក្លឹប Paris Saint-Germain លោក Nasser Al-Khelaifi បាន​បញ្ជាក់​ថា គាត់​ចាប់​អារម្មណ៍​ក្នុង​ការ​ចុះហត្ថលេខា​លើ​ខ្សែបម្រើ Jude Bellingham របស់​ក្លឹប Borussia Dortmund។

យ៉ាង​ណា​មិញ​កីឡាករ​វ័យ 19 ឆ្នាំ​រូបនេះ​ត្រូវ​បាន​គេ​ឃើញ​ថា នឹង​មាន​អនាគត​ក្លាយ​ជា​កីឡាករ​ដ៏​អស្ចារ្យ​ម្នាក់​នៅ​ក្នុង​ពិភព​បាល់ទាត់ ហើយ​ទម្រង់​លេង​កាន់​តែ​ល្អ​ពី​មួយ​ប្រកួត​ទៅ​មួយ​ប្រកួត​របស់​គាត់ បាន​ទាក់ទាញ​ចំណាប់​អារម្មណ៍​របស់​ក្លឹប​ធំៗ​ជា​ច្រើន​ផង​ដែរ។

ចាប់​តាំង​ពី​បាន​មក​ដល់ Borussia Dortmund ដោយ​ផ្ទេរ​ពី​ក្លឹប Birmingham City កាល​ពី​ឆ្នាំ 2020 ខ្សែបម្រើ​ឆ្នើម Jude Bellingham បាន​ស៊ុត​បញ្ចូល​ទី 19 គ្រាប់ និង 22 Assists ក្នុង​ការ​បង្ហាញ​ខ្លួន​សរុប 112 ប្រកួត នៅ​គ្រប់​ព្រឹត្តិការណ៍​ទាំង​អស់​របស់​ក្លឹប។

នៅ​ពេល​ត្រូវ​បាន​សួរ​ក្នុង​បទ​សម្ភាសន៍​ជាមួយ Sky Sports News លោក Al-Khelaifi ត្រូវ​បាន​គេ​សួរ​ថា តើ​ក្លឹប PSG របស់​លោក​កំពុង​ស្វែងរក​ឱកាស​ក្នុង​ការ​ចុះ​ហត្ថលេខា​លើ Jude Bellingham រឺ​យ៉ាង​ណា? ពេល​នោះ​លោក Al-Khelaifi បាន​និយាយ​ថា៖ “គ្រប់​គ្នា​ចង់​បាន​គាត់, ខ្ញុំ​នឹង​មិន​លាក់​បាំង​វា​ទេ។ គាត់​នៅ​ក្លឹប​របស់​គាត់ ហើយ​យើង​ត្រូវ​តែ​មាន​ការ​គោរព ដូច្នេះ​ប្រសិន​បើ​យើង​ចង់​និយាយ​ជា​មួយ​គាត់ យើង​នឹង​និយាយ​ជា​មួយ​ក្លឹប​របស់​គាត់​ជា​មុន​សិន”។

Al-Khelaifi បាន​បន្ថែម​ទៀត​ថា “Jude Bellingham ជា​កីឡាករ​ម្នាក់​ដ៏អស្ចារ្យ។ អង់គ្លេស​មាន​សំណាង​ដែល​មាន​គាត់ និយាយ​ដោយ​ស្មោះត្រង់ គាត់​ជា​កីឡាករ​ល្អ​បំផុត​ម្នាក់​ក្នុង​ព្រឹត្តិការណ៍​នៃ​ការ​​ប្រកួត​បាល់ទាត់​ពិភព​លោក។ អ្វី​ដែល​កាន់​តែ​ល្អ​ទៀត​នោះ ថ្វីត្បិត​តែ​ការ​ប្រកួត​បាល់ទាត់​ពិភពលោក គឺ​ជា​លើក​ដំបូង​របស់​គាត់, តែ​គាត់​លេង​ដោយ​ស្ងប់ស្ងាត់ និង​ពោរពេញ​ដោយ​ទំនុក​ចិត្ត​បំផុត”។

ប្រភព: Sportsmole