Fred ចង់ចាកចេញ ប្រសិន​បើ​ក្លឹប​មិន​ផ្ដល់​ឱកាស​ឲ្យ​គាត់​លេង​បាន​ទៀង​ទាត់

ខ្សែបម្រើ​កណ្ដាល​របស់​ក្លឹប​បិសាចក្រហម Manchester United គឺ​កីឡាករ Fred បាន​សារ​ភាព​ថា គាត់​មិន​ទាន់​សម្រេច​ចិត្ត​ច្បាស់លាស់​អំពី​អនាគត​របស់​ខ្លួន​នៅ​ក្លឹប​បច្ចុប្បន្ន​ឡើយ បន្ទាប់​ពី​មាន​ការ​ចាប់​អារម្មណ៍​ពី​ក្លឹប Fulham ដែល​នៅ​ក្នុង​ក្របខ័ណ្ឌ Premier League ដូចគ្នា​ចង់​បាន​គាត់។

យ៉ាង​ណា​មិញ Fred ​នៅ​​សល់​កុងត្រា​មួយ​ឆ្នាំ​ទៀត​ជាមួយ Manchester United ហើយ​​គាត់​​បាន​ទទូច​ថា ចង់​​ក្លាយ​ជា​កីឡាករ​​សំខាន់​ម្នាក់ ដែល​តែងតែ​លេង​ជា​ប្រចាំ​សម្រាប់​ការ​ប្រកួត​របស់​ក្លឹប។ ទន្ទឹម​នឹង​នេះ​ដែរ កីឡាករ​សញ្ជាតិ​ប្រេស៊ីល​រូប​នេះ អាច​នឹង​ត្រូវ​ក្លឹប​សម្រេច​ចិត្ត​លក់​ចេញ​នៅ​រដូវ​ក្តៅ​នេះ ប្រសិន​បើ​ពួក​គេ​មិន​ចង់​ឃើញ​គាត់​ចាក​ចេញ​ដោយ​គ្មាន​តម្លៃ​ខ្លួន​នៅ​ឆ្នាំ​ក្រោយ។

ដោយ​ឡែក​លោក Erik ten Hag ដែល​ជា​គ្រូ​បង្វឹក​របស់​ក្លឹប ក៏​កំពុង​សម្លឹង​មើល​ការ​ពង្រឹង​នៅ​ជម្រើស​ខ្សែបម្រើ​របស់​គាត់​ផង​ដែរ ជាមួយ​នឹង​ការ​ចុះហត្ថលេខា​លើ​កីឡាករ​ចំណូល​ថ្មី​យ៉ាង​ហោចណាស់​ម្នាក់ ហើយ​ជាក់​ស្ដែង​ពេល​នេះ​ពួក​គេ​កំពុង​ពិភាក្សា​ជាមួយ​ក្លឹប​តោខៀវ Chelsea ដោយ​ក្លឹប​ទាំង​ពីរ​អាច​នឹង​ព្រមព្រៀង​គ្នា​ជា​ទឹកប្រាក់ 50 លានផោន សម្រាប់​ផ្ទេរ Mason Mount។

ស្រប​ពេល​ជាមួយ​គ្នា​នេះ​ដែរ Fred កំពុង​ត្រូវ​បាន​ផ្សារ​ភ្ជាប់​ជាមួយ​នឹង​ការ​ផ្លាស់​ទៅ Fulham នៅ​មុន​រដូវកាល​ក្រោយ​ចាប់​ផ្ដើម។ នៅ​ពេល​ត្រូវ​បាន​សួរ​បន្ទាប់​ពី​ការ​ប្រកួត​វគ្គ​ផ្តាច់ព្រ័ត្រ FA Cup កាល​ពី​ចុង​សប្តាហ៍​មុន Fred បាន​និយាយ​នៅ​ក្នុង​បទ​សម្ភាសន៍ថា៖ “ខ្ញុំ​នៅ​តែ​មិន​ច្បាស់​ពី​រឿង​នេះ។ ខ្ញុំ​ត្រូវតែ​និយាយ​ជាមួយ​គ្រួសារ​របស់​ខ្ញុំ ខ្ញុំ​នៅ​មាន​កុងត្រា​​នៅ​សល់​មួយ​ឆ្នាំ​ទៀត នៅ​ទីនេះ។… ខ្ញុំ​ចង់​ក្លាយ​ជា​កីឡាករ​សំខាន់ ខ្ញុំ​ចង់​ជួយ​ក្រុម…។ ពិត​ណាស់! ខ្ញុំ​តែងតែ​ចង់​ចូល​លេង ដើម្បី​ជួយ​ក្រុម​របស់​ខ្ញុំ ហើយ​ពិត​ជា​រីករាយ​ជា​មួយ​នឹង​ការ​ក្លាយ​ជា​ជម្រើស​ដំបូង”។

ប្រភព: Dailypost NG