វីរបុរស​របស់ Liverpool ម្នាក់​និយាយ​ថា Casemiro មិន​អាច​ចាត់​ទុក​ជា​កីឡាករ​ដ៏​អស្ចារ្យ​នោះ​ទេ

អតីត​វីរបុរស​របស់​ក្លឹប​ហង្សក្រហម Liverpool លោក Graeme Souness បាន​លើក​ឡើង​ថា ខ្សែបម្រើ Casemiro របស់​ក្លឹប​បិសាចក្រហម Manchester United មិនមែន​ជា​កីឡាករ​បាល់ទាត់​ដ៏​អស្ចារ្យ​នោះ​ទេ។ លោក Graeme Souness បាន​សង្កត់​ធ្ងន់​ថា Casemiro គឺ​ជា​កីឡាករ​ដ៏​ល្អ​ម្នាក់ ប៉ុន្តែ​មិន​ចាត់​ទុក​ជា​កីឡាករ​បាល់ទាត់​ដ៏​អស្ចារ្យ​ម្នាក់​បាន​ឡើយ។

ថ្លែង​ទៅ​កាន់ talkSPORT លោក Souness បាន​និយាយ​ថា៖ “ខ្ញុំ​នៅ​តែ​ជឿ​ថា Casemiro គឺ​ជា​កីឡាករ​ដ៏​ល្អ​ម្នាក់ តែ​អ្នក​មិន​អាច​និយាយ​ថា គេ​ជា​កីឡាករ​ដ៏​អស្ចារ្យ​ម្នាក់​នោះ​ទេ”។

ទោះ​បី​ជា Graeme Souness អះអាង​បែប​នេះ​ក៏​ដោយ តែ​យើង​ឃើញ​ថា កីឡាករ​វ័យ 31 ឆ្នាំ​រូបនេះ​បាន​ជួយ​បិសាចក្រហម​ឲ្យ​​ឈ្នះពាន Carabao Cup និង​បញ្ចប់​ក្នុង​ចំណាត់​ថ្នាក់ Top 4 ​នៅ Premier League ក្នុង​រដូវកាល 2022/2023។

យ៉ាង​ណា​មិញខ្សែ​បម្រើ Casemiro បាន​ចូលរួម​ជា​មួយ​បិសាចក្រហម Manchester United ដោយ​ផ្ទេរ​ពី Real Madrid កាល​ពី​រដូវក្តៅ​ឆ្នាំ​មុន។ កីឡាករ​សញ្ជាតិ​ប្រេស៊ីល​រូប​នេះ នៅ​តែ​មាន​ទម្រង់​លេង​ដ៏​ល្អ និង​ក្លាយ​ជា​​កីឡាករ​ដ៏​សំខាន់​ក្រោម​ការ​ដឹកនាំ​របស់​គ្រូ​បង្វឹក​លោក Erik ten Hag។

ប្រភព: Dailypost NG