បាល់ទាត់អន្តរជាតិ

បិសាចក្រហមរកឃើញបេក្ខភាពខ្សែបម្រើឆ្នើមដែលអាចជំនួសកន្លែងរបស់ Casemiro

Published

6 months ago

November 17, 2023

Lee Lee

ក្លឹបបិសាចក្រហម Manchester United ត្រូវបានគេរាយការណ៍ថា បានកំណត់គោលដៅរបស់ខ្លួនទៅលើខ្សែបម្រើរបស់ក្លឹប Monaco គឺកីឡាករ Youssouf Fofana ជាអ្នកជំនួសតំណែងដ៏សាកសមរបស់ Casemiro។

បន្ទាប់ពីការមកដល់របស់ Casemiro ដោយផ្ទេរពី Real Madrid ក្នុងឆ្នាំ 2022 ខ្សែបម្រើកណ្ដាលរូបនេះបាន ចាប់ផ្ដើមជាមួយនឹងរដូវកាលដំបូងដ៏គួរឲ្យចាប់អារម្មណ៍សម្រាប់ Man United ដោយបានរួមចំណែកជាមួយនឹងការស៊ុតបញ្ចូលទីបានចំនួន 7 គ្រាប់ និង Assists បានចំនួន 7 ដង ក្នុងការបង្ហាញខ្លួន 53 ប្រកួតនៅគ្រប់ព្រឹត្តិការណ៍ទាំងអស់របស់ក្លឹប។

Casemiro គឺជាផ្នែកដ៏សំខាន់របស់ក្លឹបបិសាចក្រហម ដែលបានឈ្នះពានរង្វាន់ EFL Cup និងដណ្ដើមបានកៅអី Top 4 កាលពីរដូវកាលមុន។ ទោះជាយ៉ាងណាក៏ដោយ ខុសពីការកសាងភាពជោគជ័យកាលពីរដូវកាលមុន Casemiro មិនសូវមានទម្រង់លេងល្អនៅរដូវកាលនេះឡើយ ដោយការបង្ហាញសមត្ថភាពរបស់គាត់ល្អតែប្រកួតមួយចំនួនតែប៉ុណ្ណោះ។

លើសពីនេះទៅទៀតខ្សែបម្រើដែលមានបទពិសោធន៍រូបនេះ នឹងអវត្តមានរហូតដល់ឆ្នាំក្រោយដោយសាររបួសសរសៃពួរ ស្របពេលដែលអនាគរបស់គាត់នៅ Old Trafford ក៏កំពុងមានភាពមិនច្បាស់លាស់ផងដែរ។ របាយការណ៍ចុងក្រោយមួយបានអះអាងថា Man United នឹងពិចារណាលើការបញ្ចេញចោលកីឡាករសញ្ជាតិប្រេស៊ីលនៅក្នុងទីផ្សារដោះដូរកីឡាកររដូវរងារខាងមុខ ដោយក្លឹបមកពីអារ៉ាប៊ីសាអូឌីតកំពុងចាប់អារម្មណ៍លើគាត់ផងដែរ។

ស្របពេលជាមួយគ្នានោះ របាយការណ៍ពី RMC Sport បានឲ្យដឹងថា ពួកគេកំពុងពិចារណារួចហើយនូវជម្រើសកីឡាករដែលអាចមកជំនួស Casemiro បាន គឺ Youssouf Fofana ដែលបច្ចុប្បន្នជាកីឡាករឆ្នើមមួយរូបរបស់ក្លឹបយក្សបារាំង Monaco។