West Ham បដិសេធ​សំណើរ​ដេញ​ថ្លៃ 90 លានផោន របស់ Man City ដែល​ចង់​បាន Declan Rice

ក្លឹប West Ham United បាន​ច្រាន​ចោល​សំណើរ​ដោយ​បើក​ចំហរ​របស់​ក្លឹប Manchester City ក្នុង​ចំនួន​ទឹក​ប្រាក់ 90 លានផោន សម្រាប់​ខ្សែ​បម្រើ​កណ្តាល Declan Rice។ យ៉ាង​ណា​មិញ​ក្លឹប​ម្ចាស់​ជើង​ឯក Europa Conference League បាន​ត្រៀម​បាត់បង់ Declan Rice នៅ​រដូវក្តៅ​នេះ​រួច​ទៅ​ហើយ សូម្បី​តែ​ប្រធាន​ក្លឹប David Sullivan ក៏​បាន​និយាយ​កាល​ពី​ខែ​មុន​ថា កីឡាករ​វ័យ 24 ឆ្នាំ​រូប​នេះ នឹង​ត្រូវ​អនុញ្ញាត​ឲ្យ​ចាកចេញ ជាមួយ​នឹង​តម្លៃ​ផ្ទេរ​ដ៏​សមរម្យ​មួយ។

ដោយ​ឡែក Declan Rice មាន​មហិច្ឆតា​ចង់​លេង​នៅ UEFA Champions League ហើយ​បច្ចុប្បន្ន​គាត់​គឺ​ជា​ចំណុច​កណ្តាល​នៃ​ការ​ចង់​បាន​ពី​ក្លឹប​កំពូល​ទាំង​ពីរ​នៅ Premier League ដែល​មាន Man City និង Arsenal។ សម្រាប់​ក្លឹប​កាំភ្លើងធំ ត្រូវ​បាន​ចាត់​ទុក​ថា ជា​បេក្ខភាព​នាំមុខ​គេ​សម្រាប់​ការ​ចុះហត្ថលេខា​លើ Declan Rice ដោយ​សារ​តែ​ខ្សែបម្រើ​រូប​នេះ បាន​យល់​ព្រម​លើ​លក្ខខណ្ឌ​ផ្ទាល់​ខ្លួន​រួច​ហើយ​ជាមួយ​ក្រុម​របស់​លោក Mikel Arteta ហើយ​ក៏​បាន​កំណត់​ថ្ងៃ​ដើម្បី​ទៅ​ដល់ Emirates រួច​ហើយ​ដែរ។

ការ​ដេញ​ថ្លៃ​ពីរ​ដង​របស់ Arsenal ត្រូវ​បាន​បដិសេធ​ដោយ West Ham ដែល​មាន​ជា​ទឹកប្រាក់ 75 លានផោន បូក​នឹង 15 លានផោន ដែល​ផ្ដល់​ជូន​ជា​បន្ត​បន្ទាប់​ក្នុង​រយៈពេល 4 ទៅ 5 ឆ្នាំ។ ស្រប​ពេល​ជាមួយ​គ្នា​នោះ Man City បាន​ដាក់​ដេញ​ថ្លៃ​លើស​​ពី​ក្លឹប​កាំភ្លើងធំ​ទៅ​ទៀត ខណៈ​ដែល​ក្រុម​របស់​លោក Pep Guardiola ចង់​បាន​កីឡាករ​ឆ្នើម​រូប​នេះ​ដើម្បី​មក​ជំនួស Ilkay Gundogan ដែល​បាន​ចាកចេញ​ទៅ Barcelona។

គេ​ជឿ​ថា ដោយ​សារ​សមត្ថភាព បូកផ្សំ​ជាមួយទម្រង់​លេង​របស់ Declan Rice បាន​ទាក់​ទាញ​ក្លឹប​ធំៗ និង​នៅ​សល់​កុងត្រា​មួយ​ឆ្នាំ​ទៀត​នោះ West Ham គិត​ថា​នឹង​ដាក់​តម្លៃ​តារា​ឆ្នើម​របស់​ពួកគេ​ចន្លោះពី 100 លានផោន ទៅ 120 លានផោន។

ប្រភព: Sportsmole