ហ៊ាន​ណាស់!!! Liverpool ត្រៀម​ដេញ​ថ្លៃ​យក Kylian Mbappe ជាមួយ​តម្លៃ​ផ្ទេរ​បំបែក​កំណត់ត្រា

ក្លឹប​ហង្សក្រហម Liverpool ត្រូវ​បាន​គេ​អះអាង​ថា បាន​ត្រៀម​ដាក់​ដេញ​ថ្លៃ​ជា​ទឹកប្រាក់​​បំបែក​កំណត់​ត្រា​ផ្ទេរដ៏​ខ្ពស់​កប់​ពពក​មិន​ធ្លាប់​មាន ដើម្បី​នាំ​យក Kylian Mbappe របស់ Paris Saint-Germain មក Anfield។ ជា​ទូទៅ​គេ​ដឹង​ថា Real Madrid ជា​ក្លឹប​តែ​មួយ​គត់​ដែល​អាច​យក​ខ្សែ​ប្រយុទ្ធ​សញ្ជាតិ​បារាំង​រូប​នេះ តែ​តាម​ពិត​ទៅ Liverpool ក៏​មាន​មហិច្ឆតា​ចង់​បាន Mbappe ដែរ។

កាល​ពី​ឆ្នាំ​មុន Mbappe ត្រូវ​បាន​ក្លឹប Real Madrid និង Liverpool ព្យាយាម​នាំ​គាត់​ចេញ​ពី Parc des Princes ប៉ុន្តែ​ទីបំផុត​កីឡាករ​វ័យ 24 ឆ្នាំ​រូប​នេះ បាន​បដិសេធ​ក្រុម​ទាំងពីរ ដើម្បី​បន្ត​ស្នាក់​នៅ​ជាមួយ​ក្លឹប​ម្ចាស់​ជើង​ឯក Ligue 1 រយៈពេល 2 ឆ្នាំ​ទៀត ដោយ​កុងត្រា​មាន​សុពលភាព​ដល់​ឆ្នាំ 2024។

ទោះ​ជា​យ៉ាង​ណា​ក៏​ដោយ ពេល​នេះ Mbappe បាន​ជូន​ដំណឹង​ដល់ PSG រួច​ហើយ​ថា គាត់​មិន​មាន​គម្រោង​ក្នុង​ការ​បន្ត​កុងត្រា​អ្វី​ទៀត​ទេ មាន​ន័យថា គាត់​អាច​ចាកចេញ​ដោយ​គ្មាន​តម្លៃ​ខ្លួន​នៅ​ចុង​រដូវកាល​ក្រោយ។ ទន្ទឹម​នឹង​នេះ​ដែរ PSG អាច​នឹង​ពិចារណា​លក់​គាត់​ចេញ​ឲ្យ​បាន​មុន​ពេល​នៃ​កុងត្រាផុត​កំណត់ ដើម្បី​បាន​ប្រាក់​ចំណេញ​មក​វិញ​ខ្លះ។

ដោយ​ឡែក​នៅ​ប៉ុន្មាន​ម៉ោង​មុន​នេះ​មាន​រឿង​ដ៏​ភ្ញាក់​ផ្អើល​មួយ ដោយ​ភ្នាក់ងារ​របស់ FIFA លោក Marco Kirdemir បាន​អះអាង​ថា Liverpool កំពុង​ត្រៀម​ខ្លួន​រួច​ជា​ស្រេច ដើម្បី​ចំណាយ​ប្រាក់​រហូត​ដល់ 300 លានដុល្លារ (237.1 លានផោន) លើ Mbappe។ ប្រសិន​បើ​កិច្ច​ព្រមព្រៀង​ផ្ទេរ​បែប​នេះ​កើត​ឡើង​មែន នឹង​ធ្វើ​ឲ្យ Mbappe ក្លាយ​ជា​កីឡាករ​ដែល​មាន​តម្លៃ​ថ្លៃ​បំផុត​ក្នុង​ប្រវត្តិសាស្ត្រ ដោយ​លើស​ពី​តម្លៃ 222 លានអឺរ៉ូ (191.8 លានផោន) ដែល PSG បាន​ចំណាយ​ដើម្បី​ចុះ​ហត្ថលេខា​លើ Neymar ពី Barcelona ក្នុង​ឆ្នាំ 2017 ទៅ​ទៀត។

ប្រភព: Sportsmole