ការ​ចាញ់​ដ៏​ធ្ងន់​ករ​បំផុត​ទាំង 5 នៅ​ក្នុង​ប្រវត្តិសាស្ត្រ​របស់​ក្លឹប​មេឃខៀវ Manchester City

ថ្វី​ត្បិតតែ​ក្លឹប​បាល់ទាត់ Manchester City បច្ចុប្បន្ន​នេះ​ជា​ក្លឹប​ដ៏​មាន​ឥទ្ធិពល​បំផុត​មួយ​ក្នុង​ពិភព​បាល់ទាត់​ក៏​ដោយ ប៉ុន្តែ​អតីត​កាល​របស់​ពួក​គេ​ក៏​មាន​ភាព​ជូរចត់​ជាមួយ​នឹង​ការ​ចាញ់​ដ៏​ធ្ងន់ករ​ជា​ច្រើន​ដង​ផង​ដែរ ហើយ​ពីមុន​ពួក​គេ​ក៏​មិន​មែន​ជា​ក្លឹប​ដែលត្រូវ​បាន​គេ​ចាត់​ទុក​​ថា​ជា ក្លឹប​យក្ស​ដូច​ពេល​នេះ​ដែរ។ យ៉ាង​ណា​មិញ ថ្ងៃ​នេះ​ក្រុម​ការងារ​យើង​នឹង​នាំ​ប្រិយមិត្ត​មក​ដឹង​ពី​ប្រវត្តិនៃ​ការ​ចាញ់​ដ៏​ច្រើន​គ្រាប់​បំផុត​នៅ​ក្នុង​ប្រវត្តិសាស្ត្រ​របស់ Manchester City។

5. ចាញ់ Chelsea 6 – 0 រដូវកាល 2007/2008

តោខៀវ Chelsea គឺ​ជា​ក្លឹប​ដែល​ស្ថិត​ក្នុង​ចំណោម​ក្រុម​ល្អ​បំផុត​ក្នុង​ប្រវត្តិសាស្ត្រ​បាល់ទាត់។ ពួកគេ​ធ្លាប់​បាន​ឈ្នះពាន​ជា​ច្រើន​ស្ទើរ​រាប់​មិន​អស់ ហើយ​នៅ​ឆ្នាំ 2007 ពួក​គេ​បាន​សាង​ការ​ចងចាំ​មួយ​មិន​អាច​ភ្លេច​បាន​ដល់ Manchester City នៅ Stamford Bridge ដោយ​លុត​ក្រុម​ភ្ញៀវ​ក្នុង​លទ្ធផល 6 ទល់នឹង 0។

4. ចាញ់ Derby County 7 – 0 រដូវកាល 1949/1950

ក្រុម​ទាំង 2 នេះ​មាន​វាសនា​ខុសគ្នា​​នា​ពេល​បច្ចុប្បន្ន ខណៈ​ដែល Man City ក្លាយ​ជា​ក្លឹប​បាល់ទាត់​ដ៏​មាន​ឥទ្ធិពល​បំផុត​មួយ​នៅ​ក្នុង​ពិភព​បាល់ទាត់ តែ Derby County កំពុង​ធ្លាក់​ចូល​ទៅ​ក្នុង​បញ្ហាហិរញ្ញ​វត្ថុ​កាន់​តែ​ជ្រៅ ហើយ​បច្ចុប្បន្ន​ពួក​គេ​លេង​នៅ​លីគ​លំដាប់​ទី 3 របស់​អង់គ្លេស។ ប៉ុន្តែ​នៅ​ឆ្នាំ 1949/1950 Derby County ធ្លាប់​បាន​យក​ឈ្នះ Manchester City ដោយ​ស៊ុតបញ្ចូល​ទី​គ្មាន​ប្រណី​រហូត​ដល់​បញ្ចប់​លទ្ធផល 7 ទល់នឹង 0។

3. ចាញ់ Wolverhampton 8 – 1 រដូវកាល 1962/1963

ដូចគ្នា​នេះ​ដែរ បច្ចុប្បន្ន​ក្លឹប Wolverhampton មិន​មែន​ជា​ក្លឹប​ដែល​ស្ថិត​ក្នុង​កែវ​ភ្នែក​របស់ Manchester City នោះ​ទេ។ ទោះ​ជា​យ៉ាង​ណា​ក្ដី បើ​យើង​ចោលភ្នែក​ក្រឡេក​មក​មើល​ពី​ប្រវត្តិ​នៃ​ការ​ប្រកួត​កាល​ពី​អតីតកាល ពួក​គេ​ធ្លាប់​ធ្វើ​ឲ្យ Man City ឈឺ​ចាប់​ដោយ​យក​ឈ្នះ​ក្នុង​លទ្ធផល 8 ទល់នឹង 1។

2. ចាញ់ Middlesbrough 8 – 1 រដូវកាល 2007/2008

វា​ទើប​នឹង​កើត​ឡើង​កាល​ពី​ប៉ុន្មាន​ឆ្នាំ​មុន​នេះ​ទេ ថ្វី​ត្បិតតែ​ពេល​នេះ Middlesbrough ធ្លាក់​ទៅ​លេង​នៅ​លីគ​លំដាប់​ទីពីរ​របស់​អង់គ្លេស ប៉ុន្តែ​កាល​ពី​ឆ្នាំ 2007 ពួក​គេជា​ក្លឹប​នៅ​ក្របខ័ណ្ឌ Premier League ហើយ​ធ្លាប់​បាន​បង្កើត​នូវ​សុបិន​អាក្រក់​មួយ​ដល់ Man City ដោយ​យក​ឈ្នះ 8 ទល់​នឹង 1។

1. ចាញ់ West Bromwich Albion 9 – 2 រដូវកាល 1957/1958

ការ​ចាញ់​ដ៏​ធ្ងន់​ករ​បំផុត​នៃ​ប្រវត្តិសាស្ត្រ​របស់​ក្លឹប Man City គឺ​ជា​ការ​​ប្រកួត​​ក្រៅ​ដី​ក្នុង​ក្រប​ខ័ណ្ឌ English 1 Division ក្នុង​រដូវ​កាល​ឆ្នាំ 1957/1958។ Man City បាន​ចាញ់​ក្នុង​លទ្ធផល​ដ៏​គួរ​ឲ្យ​អាម៉ាស់ 9 ទល់​នឹង 2 ក្រោម​ស្នាដៃ​របស់ West Bromwich Albion។ យ៉ាង​ណា​ក៏​ដោយ បច្ចុប្បន្ន​នេះ​ក្លឹប​ទាំង​ពីរ​មាន​វាសនា​ខុស​គ្នា​ដូច​មេឃ​នឹង​ដី ដោយ West Bromwich Albion ធ្លាក់​ទៅ​លេង​នៅ Championship ខណៈ​ដែល Man City ជា​អធិរាជ​នៅ​ក្របខណ្ឌ​កំពូល​របស់​អង់គ្លេស Premier League។

ប្រភព: Interestingfootball