Robert Lewandowski ប្រាប់​ថា មិន​មាន​នរណា​ម្នាក់​សម​នឹង​ឈ្នះ Ballon d’Or ជាង​កីឡាករ​រូប​នេះ​ទេ

ថ្មីៗ​នេះ ខ្សែ​ប្រយុទ្ធ​ឆ្នើម​របស់​ក្លឹប​អ្នក​មាន​បុណ្យ Barcelona គឺ​កីឡាករ Robert Lewandowski បាន​បង្ហាញ​ទស្សនៈ​នៃ​ការ​យល់​ឃើញ​របស់​ខ្លួន​ពាក់ព័ន្ធ​នឹង​កីឡាករ​ដែល​ជា​បេក្ខភាព​នាំ​មុខ​គេ និង​សាកសម​ជា​ម្ចាស់​ពាន Ballon d’Or ប្រចាំ​ឆ្នាំ 2023។ កីឡាករ​សញ្ជាតិ​ប៉ូឡូញ​រូប​នេះ​បាន​លើក​ឡើង​ថា Lionel Messi គឺ​ជា​បេក្ខភាព​ដែល​សម​នឹង​ឈ្នះ​ពាន Ballon d’Or នៅ​ឆ្នាំ​នេះ។

យ៉ាង​ណា​មិញ នៅ​ពេល​ត្រូវ​បាន​គេ​សួរ​ថា តើ​កីឡាករ​ដែល​ឈ្នះ Ballon d’Or ឆ្នាំ 2023 បាន​បង្ហាញ​ច្បាស់​ហើយ រឺ​នៅ? ពេល​នោះ Robert Lewandowski បាន​ប្រាប់ Mundo Deportivo ថា៖ “ប្រហែល​ជា​មាន​កីឡាករ​ម្នាក់​ទៀត (Mbappe) ដែល​លេង​ឲ្យ​ក្លឹប PSG ដូចគ្នា។ ប៉ុន្តែការ​ឈ្នះពាន World Cup តែ​មួយ​គត់​ដែល​ជា​អ្នក​សម្រេច​ថា ពាន​នោះ​នឹង​​ឈ្នះ​ដោយ​អ្នក​ណា​នៅ​រដូវកាល​នេះ។ Lionel Messi បច្ចុប្បន្ន​ស្ថិត​ក្នុង​បេក្ខភាព​ខ្ពស់​បំផុត ព្រោះ​​គាត់​​បាន​សម្រេច​អ្វីៗ​គ្រប់​យ៉ាង​សម្រាប់​ខ្លួន​ឯង…”។

គួរ​រំលឹក​ផង​ដែរ​ថា Lewandowski ធ្លាប់​បាន​ជូរចត់​ចំពោះ​ការ​ខកខាន​មិន​បាន​ឈ្នះ Ballon d’Or ក្នុង​ឆ្នាំ 2021 នៅ​ពេល​ដែល​គាត់​ឡើង​ជើង​ខ្លាំង និង​ឈ្នះពាន​ជា​ច្រើន​ ប៉ុន្តែ​បាន​ចាញ់​សម្លេង​នៃ​ការ​បោះឆ្នោត​ជាមួយ Messi។ ទោះ​ជា​យ៉ាងណា​ក្ដី ឆ្នាំ​នេះ​អ្វីៗ​ហាក់​បី​ដូចជា​ខុស​គ្នា​ស្រឡះរវាង​អ្នក​ទាំង​ពីរ ព្រោះ Messi កំពុង​មាន​ភាគរយ​ខ្ពស់​ក្នុង​ការ​ឈ្នះពាន​នេះ​ជា​លើក​ទី 8 ក្នុង​អាជីព​របស់​ខ្លួន ខណៈ​​ដែល Lewandowski ក៏​បាន​ទទួល​ស្គាល់​ភាព​អស្ចារ្យ​របស់​តារា​ឆ្នើម​សញ្ជាតិ​អាហ្សង់ទីន​រូប​នេះ​ដែរ។

ប្រភព: Tribuna