Barcelona កំណត់​បេក្ខភាព​ខ្សែ​ប្រយុទ្ធ​ដែល​នឹង​មក​ជំនួស​កន្លែង​របស់ Dembele

ក្លឹប​អ្នក​មាន​បុណ្យ Barcelona នឹង​ព្យាយាម​ជា​ថ្មី​ម្ដង​ទៀត ដើម្បី​ចុះ​ហត្ថលេខា​លើ​ខ្សែប្រយុទ្ធ​ស្លាប Bernardo Silva របស់ Manchester City ប្រសិន​បើ Ousmane Dembele ចាកចេញ​ពី Camp Nou ទៅ​ក្លឹប​ថ្មី​នៅ​រដូវក្តៅ​នេះ (យោងតាម​របាយការណ៍​ពី​កាសែត El Nacional)។

យើង​បាន​ដឹង​ហើយ​ថា Paris Saint-Germain កំពុង​ចរចា​ចុះ​ហត្ថលេខា​លើ Dembele ក្នុង​នាម​ជា​អ្នក​ជំនួស​កន្លែង​របស់ Kylian Mbappe នៅ Parc des Princes ស្រប​ពេល​ដែល​ពួកគេ​កំពុង​មាន​ការ​ធុញទ្រាន់​ជា​មួយ​នឹង​ភាព​មិន​ច្បាស់លាស់​របស់ Mbappe ដែល​មិន​ព្រម​បន្ត​កុងត្រា​ថ្មី។

ដំបូង​ឡើយ​តម្លៃ​ខ្លួន​នៃ​ការ​ផ្ទេរ​ចេញ​របស់ Dembele មាន​​តម្លៃ​ប្រហែលជា 50 ​លាន​អឺរ៉ូ ប៉ុណ្ណោះ ដោយ​សារ​​លក្ខខណ្ឌ​ដែល​បាន​កំណត់​កាល​ពី​មុន ប៉ុន្តែ​តម្លៃ​នេះ​នឹង​កើន​ឡើង​ដល់ 100 លានអឺរ៉ូ នៅ​ថ្ងៃទី 1 ខែសីហា ហើយ​ក្លឹប Barcelona ត្រូវ​បាន​គេ​រាយការណ៍​ថា មិន​មាន​ភាព​ស្រពេច​ស្រពិល រឺ​ពិចារណា​អ្វី​ច្រើន​ទៀត​ឡើយ ដោយ​សារ​ការ​ចាកចេញ​របស់​គាត់ នឹង​នាំ​យក​ប្រាក់​យ៉ាង​ច្រើន​ដល់​ពួកគេ។

តម្លៃ​ដែល Barcelona ទទួល​បាន​ពី​ការ​លក់ Dembele នឹង​អាច​ឲ្យ​ពួក​គេ​ចុះ​ហត្ថលេខា Bernardo Silva ពី Man City បាន។ គ្រូ​បង្វឹក​របស់​ក្លឹប Barcelona លោក Xavi Hernandez ត្រូវ​បាន​គេ​ដឹង​ថា ជា​អ្នក​ដែល​ពេញ​ចិត្ត​នឹង​ខ្សែ​ប្រយុទ្ធ​សញ្ជាតិ​ព័រទុយហ្គាល់​រូប​នេះ​ផងដែរ។ យ៉ាង​ណា Bernardo Silva ជា​កីឡាករ​ដែល​នៅ​មាន​តម្លៃ​ផ្ទេរ​ខ្ពស់ ព្រោះ​កុងត្រា​បច្ចុប្បន្ន​របស់​គាត់​ជា​មួយ Man City នៅ​មាន​សុពលភាព​រហូត​ដល់​​ឆ្នាំ 2025។

ប្រភព: Dailypost NG