បាល់ទាត់អន្តរជាតិ
West Ham ដាក់សំណើរដេញថ្លៃឡើងដល់ 30 លានផោនសម្រាប់ Harry Maguire
ក្លឹប West Ham United ត្រូវបានគេរាយការណ៍ថា បានដាក់សំណើរជាថ្មីម្ដងទៀតដែលមានទំហំទឹកប្រាក់កើនឡើងដល់ 30 លានផោន សម្រាប់ខ្សែការពារកណ្តាល Harry Maguire របស់ក្លឹបបិសាចក្រហម Manchester United ដើម្បីនាំយកគាត់ពីទឹកដី Old Trafford នៅរដូវក្តៅនេះ។
កីឡាករវ័យ 30 ឆ្នាំរូបនេះបានធ្លាក់ចុះនូវទម្រង់លេង ក៏ដូចជាជម្រើសដែលស្ថិតក្នុងចិត្តរបស់លោក Erik ten Hag កាលពីរដូវកាលមុន។ Harry Maguire បានបង្ហាញខ្លួនជាជម្រើសដំបូងនៅក្នុងការប្រកួតត្រឹមតែ 8 ដងប៉ុណ្ណោះ ក្នុងក្របខណ្ឌ Premier League នៅរដូវកាល 2022-2023។
ទោះជាយ៉ាងណាក៏ដោយ Maguire នៅតែត្រូវបានកោះហៅឲ្យចូលក្រុមជម្រើសជាតិអង់គ្លេសរបស់លោក Gareth Southgate ស្របពេលដែលកីឡាករកំពុងឡើងជើង Fikayo Tomori របស់ AC Milan ជាជម្រើសក្រោយគាត់ប៉ុណ្ណោះ។ ដោយមើលឃើញថា ខ្សែការពាររូបនេះនៅមានទម្រង់លេងដែលអាចល្អប្រសើរបាន West Ham United ចាប់អារម្មណ៍លើកីឡាករវ័យ 30 ឆ្នាំរូបនេះ។ យោងតាមគេហទំព័រ The Sun បានឲ្យដឹងថា ពេលនេះក្លឹប West Ham បានដាក់សំណើរដេញថ្លៃជាលើកទី 2 ដែលមានតម្លៃ 30 លានផោនសម្រាប់ Maguire និងរងចាំលទ្ធផលនៃការពិចារណារបស់ក្លឹបបិសាចក្រហម Manchester United។
ប្រភព: Sportsmole