Erling Haaland នឹង​ក្លាយ​ជា​កីឡាករ​ដែល​មាន​ប្រាក់​ខែ​ខ្ពស់​ជាង​គេ​ប្រចាំ Premier League

ក្លឹប​មេឃខៀវ Manchester City ត្រូវ​បាន​គេ​រាយការណ៍​ថា កំពុង​រៀប​ចំ​បើក​ការ​ពិភាក្សា​ជាមួយ Erling Haaland លើ​ការ​បន្ត​កុងត្រា​ថ្មី ដែល​ក្នុង​កុងត្រា​នោះ​នឹង​ធ្វើ​ឲ្យគាត់​ក្លាយ​ជា​កីឡាករ​ដែល​មាន​ប្រាក់​ខែ​ច្រើន​ជាង​បំផុត ក្នុង​ចំណោម​កីឡាករ​ទាំង​អស់​នៅ​ក្នុង​ក្របខ័ណ្ឌ Premier League។

កីឡាករ​វ័យ 23 ឆ្នាំ​រូបនេះ​បាន​ស៊ុតបញ្ចូលទី​សរុប​បាន 58 គ្រាប់ និង Assist 10 ដង ក្នុង​ការ​បង្ហាញ​ខ្លួន 59 ប្រកួត​ជាមួយ Manchester City ចាប់​តាំង​ពី​បាន​ផ្ទេរ​ពី​ក្លឹប Borussia Dortmund នៅ​រដូវក្តៅ​ឆ្នាំ 2022។ Haaland គឺ​ជា​គន្លឹះ​នៃ​ភាពជោគជ័យ និង​ការ​ឈ្នះពាន 3 ក្នុង​មួយ​រដូវកាល​របស់​លោក Pep Guardiola កាល​ពី​រដូវកាល​មុន ដោយ​ស៊ុតបញ្ចូលទី​​បាន 52 គ្រាប់ និង​បញ្ជូន​បាល់ឱ្យមិត្តរួមក្រុមចំនួន 9 ដង​ក្នុង​ការ​បង្ហាញ​ខ្លួន 53 ប្រកួត នៅ​គ្រប់ព្រឹត្តិការណ៍នៃ​ការ​ប្រកួត​ទាំង​អស់​របស់​ក្លឹប។

កីឡាករ​សញ្ជាតិ​ន័រវេស​រូបនេះ នៅ​តែ​មាន​ទម្រង់​លេង​ដ៏​លេច​ធ្លោរ​នៅ​រដូវកាល​នេះ និង​ទើប​តែ​បាន​ស៊ុត​បញ្ចូលទី Hat-trick កាល​ពី​ប៉ុន្មាន​ថ្ងៃ​មុន ក្នុង​ការ​ប្រកួត​តទល់​នឹង​ក្លឹប Fulham ដែល​ជា​ការ​ប្រកួត Premier League។ Haaland នៅ​សល់​កុងត្រា​រយៈពេល 4 ឆ្នាំទៀត ជាមួយ​ក្លឹប​បច្ចុប្បន្ន​របស់​ខ្លួន ប៉ុន្តែ Man City នៅ​តែ​មិន​ទុក​ចិត្ត​ថា ខ្សែ​ប្រយុទ្ធ​ឆ្នើម​រូប​នេះ​នឹង​បន្ត​នៅ​ជា​មួយ​ពួក​គេ​រយៈពេល​យូរ​រឺ​អត់ ស្រប​ពេល​ដែល​ក្លឹប Real Madrid តែងតែ​ស្វែងរក​ឱកាស​ចង់​នាំ​យក​គាត់ទៅ Santiago Bernabeu។

យោងតាម​កាសែត The Sun បាន​ឲ្យ​ដឹង​ថា Man City បាន​រក​ឃើញ​វិធី​ដើម្បី​រក្សា​ទុក​ខ្សែប្រយុទ្ធ​រូបនេះ​ឲ្យ​បាន​យូរ ដោយ​គ្រោង​នឹង​បើក​ការ​ពិភាក្សា​ជាមួយ​អ្នក​តំណាង​របស់​គាត់​អំពី​ការ​បន្ត​កុងត្រា​ថ្មី និង​តម្លើង​ប្រាក់​ខែ​ឲ្យ​ខ្ពស់​ជាង​មុន។ របាយការណ៍​ដដែល​នេះ​ដែរ​បាន​អះអាង​ថា Haaland អាច​ត្រូវ​​បាន​ផ្តល់​ជូន​ប្រាក់ពលកម្ម 550,000 ផោន ក្នុង​មួយ​សប្តាហ៍ ដែល​នឹង​នាំ​គាត់​រក​បាន​ចំណូល​លើស​ពី​មិត្ត​រួម​ក្រុម Kevin De Bruyne ហើយ​ក៏​ធ្វើ​ឲ្យ​គាត់​ក្លាយ​ជា​កីឡាករ​ដែល​រក​បាន​ចំណូល​ច្រើន​ជាង​គេ​ប្រចាំ​ក្របខណ្ឌ​កំពូល​របស់​អង់គ្លេស Premier League ផង​ដែរ។

ប្រភព: Sportsmole