David Silva ថា មាន​តែ​ក្រុម​មួយ​នេះ​ប៉ុណ្ណោះ ដែល​អាច​ប្រជែង​ពាន Premier League ជាមួយ Man City បាន

អតីត​ខ្សែបម្រើ​ឆ្នើម​សញ្ជាតិ​អេស្ប៉ាញ David Silva បាន​និយាយ​ថា មាន​តែ​ក្លឹប​កាំភ្លើងធំ Arsenal ទេ ដែល​អាច​ប្រជែង​ជាមួយ Manchester City សម្រាប់​ការ​ឈ្នះពាន Premier League នៅ​រដូវកាល​នេះ​បាន។ យ៉ាង​ណា​មិញ កាល​ពី​រដូវកាល​មុន Man City និង Arsenal ក៏​ជា​គូ​ប្រជែង​គ្នា​ក្នុង​ការ​ដណ្ដើម​ពាន​លីគ​ដែរ ប៉ុន្តែ​ចុង​ក្រោយ Man City បាន​ក្លាយ​ជា​ម្ចាស់ពាន​ដោយ​ឈ្នះ​ពិន្ទុ​ពី​លើ Arsenal ត្រឹមតែ 5 ពិន្ទុ​ប៉ុណ្ណោះ។

ថ្វី​ត្បិតតែ​មិន​អាច​ឈ្នះពាន​កាល​ពី​រដូវកាល​មុន ប៉ុន្តែ Arsenal បាន​បញ្ចប់​រដូវកាល​ដោយ​ចំណាត់​ថ្នាក់​លេខ 2 និង​ទទួល​បានកៅអី​លេង​ពាន UCL ដែល​ពួក​គេ​បាន​ខកខាន​តាំង​ពី​ឆ្នាំ 2017 មក។ សម្រាប់​ក្លឹប​បិសាចក្រហម Manchester United បាន​បញ្ចប់​ក្នុង​ចំណាត់​ថ្នាក់​លេខ​ 3 ខណៈ​ដែល Newcastle United ដណ្តើម​បាន​ចំណាត់​ថ្នាក់​លេខ 4។

យ៉ាង​ណា​មិញ​បច្ចុប្បន្ន​ Man City កំពុង​​ឈរ​កំពូល​តារាង​ដោយ​ឈ្នះ​ទាំង 4 ប្រកួត របស់​ពួក​គេ​ដោយ​មាន 12 ពិន្ទុ​ពេញ ស្រប​ពេល​ដែល Arsenal មាន 10 ​ពិន្ទុ ដោយ​សារ​ស្មើ​មួយ​ប្រកួត​ទល់​នឹង Fulham។

ខ្សែបម្រើ David Silva ដែល​ធ្លាប់​ជា​អតីត​កីឡាករ​របស់​ក្លឹប Man City ដែរ​នោះ ថ្មីៗ​នេះ​បាន​ប្រាប់​កាសែត UK Mirror ថា៖ “Arsenal គឺ​ជា​ក្រុម​តែ​មួយ​គត់​ដែល​ខ្ញុំ​អាច​មើល​ឃើញ​ថា មាន​ឱកាស​ប្រជែង​ពាន​ជាមួយ Man City។ យ៉ាង​ណា ខ្ញុំ​មិន​គិត​ថា​ពួក​គេ​អាច​ធ្វើ​បាន​ទេ”។

David Silva បាន​និយាយ​បន្ថែម​ទៀត​ថា៖ “ខ្ញុំ​បាន​មើល​ការ​ប្រកួត​ស្ទើរ​តែ​ទាំង​អស់​របស់ Man City ក្នុង​ក្របខ័ណ្ឌ UEFA Champions League កាល​ពី​រដូវកាល​មុន។ ខ្ញុំ​មិន​អាច​ឈ្នះ​វា​នៅ​ពេល​ដែល​ខ្ញុំ​នៅ​ទីនោះ ប៉ុន្តែ​ខ្ញុំ​រីករាយ​ណាស់​សម្រាប់​ក្លឹប​ដែល​ទីបំផុត​ពួក​គេ​អាច​ធ្វើ​បាន”។

ប្រភព: Dailypost NG