Rio Ferdinand ថា កីឡាករ​សញ្ជាតិ​អង់គ្លេស​រូប​នេះ អាច​​ឈ្នះ Ballon d’Or ពីរ​រឺ​បី​ដង មុន​នឹង​គេ​ចូល​និវត្តន៍​ពី​បាល់ទាត់

អតីត​ខ្សែការពារ​របស់​ក្លឹប​បិសាចក្រហម Manchester United លោក Rio Ferdinand បាន​និយាយ​ថា ខ្សែបម្រើ Jude Bellingham របស់​ក្លឹប Real Madrid នឹង​អាច​ឈ្នះ Ballon d’Or យ៉ាង​ហោច​ណាស់​បី​ក្នុង​អាជីព​បាល់​ទាត់​របស់​ខ្លួន ប្រសិន​បើ​ទម្រង់​លេង​របស់​គាត់​នៅ​តែ​លេចធ្លោរ​ដូច​បច្ចុប្បន្ន​នេះ។

Rio Ferdinand ជឿជាក់​ថា ខ្សែ​បម្រើ​ឆ្នើម​រូប​នេះ​មាន​សមត្ថភាព និង​ឆន្ទៈ​ជា​កីឡាករ​ដ៏​អស្ចារ្យ​​ដែលសម​នឹង​ទទួល​បាន​ពាន​រង្វាន់​បុគ្គល​ដ៏​អស្ចារ្យ​ក្នុង​ពិភពបាល់ទាត់​គឺ Ballon d’Or។ យ៉ាង​ណា​មិញ Bellingham កំពុង​ក្លាយ​ជា​កីឡាករ​ដ៏​លេចធ្លោរ​ម្នាក់​របស់ Real Madrid បន្ទាប់​ពី​បាន​ផ្ទេរ​មក​ចូលរួម​ជាមួយ​ក្លឹប​នៅ​រដូវក្តៅ​នេះ ក្នុង​តម្លៃ​ផ្ទេរ 113 លានផោន​ពី Borussia Dortmund។

ថ្វីត្បិតតែ​លេង​ក្នុង​តួនាទី​ពិត​ប្រាកដ​ជា​ខ្សែបម្រើ​មែន ប៉ុន្តែ​កីឡាករវ័យ 20 ឆ្នាំ​រូបនេះ​បាន​ស៊ុត​បញ្ចូលទី​បាន 5 គ្រាប់​មក​ហើយ នៅ​ក្នុង​ការ​ប្រកួត​បើកឆាក​ចំនួន 4 របស់​គាត់​ជាមួយក្លឹប​ថ្មី Real Madrid។

ដោយ​មើល​ឃើញ​ពី​ភាព​ល្អ​ឥតខ្ចោះ​នេះ Rio Ferdinand បាន​និយាយ​កាល​ពី​ពេល​ថ្មីៗ​នេះ​នៅ​លើ​វិទ្យុ BBC Radio 5Live ថា៖ “គាត់ (Bellingham) នឹង​ត្រូវ​ប្រឈម​មុខ​ដោយ​គេ​ប្រៀបប្រដូច​ទៅ​នឹង Gerrard, Lampard, Scholes ហើយ​ខ្ញុំ​នឹង​និយាយ​ឲ្យ​ច្បាស់​ពេល​នេះ​ថា គ្មាន​នរណា​ម្នាក់​ក្នុង​ចំណោម​កីឡាករ​ទាំង​នោះ អាច​ធ្វើដូច​អ្វី​ដែល Bellingham កំពុង​ធ្វើ​បាន​នៅ​អាយុ​ប៉ុណ្ណេះ​ទេ។… ដូច្នេះ​គាត់​អាច​បន្ត​ដំណើរ​ទៅ​មុខ​ទៀត ដើម្បី​ឈ្នះ Ballon d’Ors។ ខ្ញុំ​នឹង​ភ្ញាក់​ផ្អើល​យ៉ាង​ខ្លាំង ប្រសិន​បើ​ក្មេង​ប្រុស​ម្នាក់​នេះ​​បញ្ចប់​អាជីព​បាល់ទាត់​របស់​គាត់​ដោយ​មិន​ឈ្នះ Ballon d’Or យ៉ាង​ហោច​ណាស់​មួយ, ពីរ រឺ​បី ព្រោះ​ខ្ញុំ​គិត​ថា​គាត់​ល្អ​ណាស់”។

ប្រភព: Dailypost NG