បាល់ទាត់អន្តរជាតិ
Barcelona ត្រៀមឆក់យកខ្សែបម្រើមួយរូបដែល Liverpool និង Man United ចង់បាន
ក្លឹបអ្នកមានបុណ្យ Barcelona ត្រូវបានគេរាយការណ៍ថា កំពុងស្ថិតក្នុងឱកាសដ៏ល្អបំផុត ក្នុងការចុះហត្ថលេខាលើកីឡាករវ័យក្មេងរបស់ក្លឹប Royal Antwerp គឺខ្សែបម្រើ Arthur Vermeeren។ កីឡាករវ័យ 18 ឆ្នាំរូបនេះ បច្ចុប្បន្នកំពុងត្រូវបានគេសង្ស័យថា នឹងអាចចាកចេញពីក្លឹបបច្ចុប្បន្នរបស់ខ្លួននាពេលឆាប់ៗខាងមុខ។
Arthur Vermeeren ត្រូវបានក្លឹបធំៗមួយចំនួននៅតំបន់អឺរ៉ុបចាប់អារម្មណ៍ខ្លាំង ហើយគេជឿថា Barcelona នឹងក្លាយជាក្លឹបដែលអាចចុះហត្ថលេខាលើកីឡាករដ៏មានទេពកោសល្យរូបនេះ។ ស្របពេលជាមួយគ្នានេះដែរ គេបានដឹងថា Manchester United, Liverpool និង Ajax ក៏ពេញចិត្តនឹងខ្សែបម្រើសញ្ជាតិបែលហ្ស៊ិករូបនេះដែរ។
ទោះបីជាយ៉ាងណាក៏ដោយ បើតាម Mundo Deportivo បានឲ្យដឹងថា Barcelona កំពុងក្លាយជាបេក្ខភាពក្លឹបដែលមានឥទ្ធិពល និងឱកាសខ្ពស់សម្រាប់ការផ្ទេរ Arthur Vermeeren។ របាយការណ៍នេះដែរបានអះអាងថា នាយកកីឡាថ្មីរបស់ Barcelona លោក Deco ក៏បានជួបជាមួយថ្នាក់ដឹកនាំនៅក្លឹប Antwerp រួចហើយដែរ ដើម្បីពិភាក្សាអំពីការផ្ទេរគេទៅទឹកដី Camp Nou នៅចុងបញ្ចប់នៃរដូវកាលនេះ។
ប្រភព: Sportsmole