Di Lorenzo លើក​ឡើង​ថា Osimhen អាច​ជួយ​ក្រុម​របស់​ពួក​គេ​ឲ្យ​ឈ្នះ​ការ​ប្រកួត​ទល់​នឹង Real Madrid រំលង​អាធ្រាត​នេះ​បាន!!!

កាពីតែន​ក្រុម​របស់​ក្លឹប Napoli គឺ​កីឡាករ Giovanni Di Lorenzo ជឿ​ជាក់​ថា មិត្ត​រួម​ក្រុម​របស់​ខ្លួន Victor Osimhen អាច​ជួយ​ឲ្យ​ពួក​គេ​​យក​ឈ្នះ Real Madrid បាន។ យ៉ាង​ណា​មិញ នៅ​ម៉ោង 2 រំលង​អាធ្រាត​នេះ (ម៉ោង​នៅ​កម្ពុជា) Napoli នឹង​ធ្វើ​ជាម្ចាស់​ផ្ទះ​ទទួល​ស្វាគមន៍​ក្រុម​ភ្ញៀវ Real Madrid ដែល​ជា​ការ​ប្រកួត​វគ្គ​ជម្រុះ​ក្នុង​ពូល​នៃ​ក្របខណ្ឌ UEFA Champions League។

Di Lorenzo បាន​និយាយ​នៅ​ក្នុង​បទសម្ភាសន៍​មុន​ការ​ប្រកួត​កាល​ពី​ម្សិលមិញ​នេះ​ថា៖ “គាត់ (Osimhen) តែងតែ​ផ្ដល់​អ្វីមួយ​សម្រាប់​មិត្ត​រួម​ក្រុម​របស់​គាត់ ដូច​ដែល​អ្នក​បាន​ឃើញ​នៅ​ក្នុង​ការ​ប្រកួត​ដែល​យើង​ទទួល​ជ័យ​ជម្នះ​លើ Lecce។ សម្រាប់​ពួក​យើង គាត់​នៅ​តែ​ជា Osimhen ដូច​ពីមុន ជា​កីឡាករ​​ដ៏​អស្ចារ្យ​ម្នាក់​ដែល​បញ្ចេញ​អស់​ពី​សមត្ថភាព ហើយ​គាត់​នឹង​បន្ត​ធ្វើ​បែប​នេះ នៅ​ថ្ងៃ​ស្អែក”។

គួរ​ដឹង​ផង​ដែរ​ថា ប្រវត្តិ​នៃ​ការ​ជួប​គ្នា​រវាង​ក្រុម​ទាំង​ពីរ​មាន​ចំនួន 4 ដង ប៉ុន្តែ Napoli មិន​ធ្លាប់​ឈ្នះ Real Madrid ឡើយ ដោយ​ចាញ់ 3 ស្មើ 1។ នៅ​រដូវកាល 1987/1988 ក្លឹប​អធិរាជស Real Madrid បានលុត Napoli សរុប​ទាំង​ពីរ​ជើង 3-1។ ក្រោយ​មក​ទៀត​នៅ​រដូវកាល​ឆ្នាំ 2016/2017 Real Madrid នៅតែ​បន្ត​ឈ្នះ Napoli ដោយ​ការ​ប្រកួត​ទាំង​ពីរលើក​នៅ​រដូវកាល​នោះ​សរុប 6-2។

ប្រភព: Dailypost NG