គ្រូ Napoli ថា ក្រុម​របស់​ខ្លួន​នៅ​តែ​ខ្លាំង ទោះ​មិន​មាន​ខ្សែប្រយុទ្ធ Victor Osimhen ក៏​ដោយ

គ្រូ​បង្វឹក​របស់​ក្លឹប Napoli លោក Rudi Garcia បាន​អួត​ថា ក្លឹប​របស់​ខ្លួន​នៅ​តែ​មាន​ទម្រង់​លេង​នៅ​តំបន់​ប្រយុទ្ធ​ខ្លាំង​ក្លា បើ​ទោះបី​ជា​បាត់បង់​ខ្សែប្រយុទ្ធ​ឆ្នើម Victor Osimhen របស់​ពួក​គេ​ដោយ​សារ​របួស​ក៏​ដោយ។ យ៉ាង​ណា​មិញ ពេល​នេះ Victor Osimhen កំពុង​សម្រាក​ពី​ការ​ប្រកួត​ដោយ​សារ​រង​របួស​ភ្លៅ ក្នុង​អំឡុង​ពេល​បំពេញ​កាតព្វកិច្ច​ជាមួយ​ក្រុម​ជម្រើស​ជាតិ​នីហ្សេរីយ៉ា​កាល​ពី​សប្តាហ៍​មុន។

ទន្ទឹម​នឹង​នេះ​ដែរ Victor Osimhen ត្រូវ​បាន​គេ​រំពឹង​ថា នឹង​ត្រូវ​អវត្តមាន​មិន​អាច​ចូល​លេង​បាន​ប្រហែល​មួយ​ខែ។ កាល​ពី​ថ្ងៃ​សៅរ៍​សប្ដាហ៍​នេះ ក្នុង​អំឡុង​ពេល​នៃ​ការ​អវត្តមាន​របស់ Victor Osimhen នោះ ក្រុម​ការពារ​តំណែង​ជើង​ឯក Napoli បាន​យក​ឈ្នះ Hellas Verona ក្នុង​លទ្ធផល 3-1 ដែល​ជា​ការ​ប្រកួត​លីគ Serie A។

គ្រាប់​បាល់​ទាំង 3 គ្រាប់​របស់ Napoli នៅ​ក្នុង​ការ​ប្រកួត​នោះ គឺ​ជា​ការ​ស៊ុត​បញ្ចូលទី​របស់​ខ្សែប្រយុទ្ធ 2 រូប​ដែល​មាន Kvicha Kvaratskhelia និង Hirving Lozano។ ក្រោយ​ចប់​ការ​ប្រកួត​លោក Rudi Garcia ដែល​ជា​គ្រូ​បង្វឹក​របស់​ក្លឹបបាន​ប្រាប់​ទៅ​កាន់ DAZN ថា៖ “Giacomo Raspadori គឺ​ជា​ខ្សែប្រយុទ្ធ​ដែល​លេង​ជាក្រុមបាន​ល្អ ហើយ​ផ្តល់​ឲ្យ​ក្រុម​មាន​តុល្យភាព​នៅ​តំបន់​កណ្តាល”។

Rudi Garcia បាន​បន្ថែម​ទៀត​ថា៖ “យើង​មាន​សំណាង​ដែល​មាន Victor Osimhen, Raspadori និង Giovanni Simeone នៅ​ក្នុង​ក្រុមនេះ​ជាមួយ​គ្នា។ វា​ជា​ការ​ប្រសើរ​ប្រសិន​បើ​គេ​មិន​មាន​របួស ប៉ុន្តែ​ខ្ញុំ​មិន​និយាយ​ពី​រឿង​នោះ​ទេ ព្រោះ​ខ្ញុំ​ដឹង​ថា យើង​នៅ​តែ​មាន​គុណភាព​ខ្លាំងក្លា​នៅ​តំបន់​ប្រយុទ្ធ”។

ប្រភព: Dailypost NG