Victor Osimhen កំពុង​ពិចារណា​លើ​ជម្រើស​ពីរ​រវាង Arsenal និង Manchester United

ខ្សែប្រយុទ្ធ Victor Osimhen របស់​ក្លឹប Napoli ត្រូវ​បាន​គេរាយការណ៍​ថា កំពុង​ទទួល​បាន​ការ​ចាប់​អារម្មណ៍​ពី​ក្លឹប​ធំៗ​ពីរ គឺ​បិសាចក្រហម Manchester United និង​កាំភ្លើងធំ Arsenal ។

ក្លឹប Premier League ទាំងពីរ​នេះ កំពុង​សម្លឹង​មើល​រក​ខ្សែ​ប្រយុទ្ធ​ដែល​អាច​បញ្ចប់​ទី​បាន​ច្បាស់​ម្នាក់ នៅ​រដូវ​ក្តៅ​នេះ។ ក្លឹប​កាំភ្លើងធំ Arsenal កំពុង​សម្លឹង​រក​អ្នក​ជំនួស Pierre-Emerick Aubameyang ដែល​បាន​ចាកចេញ​ទៅ Barcelona ខណៈ​ដែល Manchester United នឹង​ត្រូវ​ការ​អ្នក​ស្នង​តំណែង​របស់ Edinson Cavani ដែល​ត្រៀម​នឹង​ចាកចេញ​នៅ​ពេល​កុងត្រា​ជា​មួយ​ក្លឹប​ត្រូវ​​បញ្ចប់។

Victor Osimhen ត្រូវ​បាន​គេ​គិត​ថា គឺ​ជា​ខ្សែ​ប្រយុទ្ធ​ម្នាក់​ដែល​ក្លឹប​ទាំង​ពីរ​ចង់បាន ហើយ​សាកសម​បំផុត​ផង​ដែរ ដោយ​កីឡាករ​រូប​នេះ​បាន​ស៊ុតបញ្ចូល​ទី 17 គ្រាប់​ក្នុង​ការ​បង្ហាញ​ខ្លួន 29 ប្រកួត សម្រាប់​ក្លឹប Napoli នៅ​រដូវកាល​នេះ។

យោង​តាម​សារព័ត៌មាន La Gazzetta dello Sport បាន​ឲ្យ​ដឹង​ថា កីឡាករ​វ័យ 23 ឆ្នាំ​រូប​នេះ នឹង​​ជ្រើសរើស​យក​ការ​ផ្ទេរ​ទៅ​កាន់​ក្រុម​កាំភ្លើងធំ Arsenal ជា​ជាង​ការ​ផ្ទេរ​ទៅ​បិសាចក្រហម ខណៈ​ដែល Arsenal ជា​បេក្ខភាព​ដែល​មាន​ភាគរយ​ខ្ពស់​ក្នុង​ការ​ចូល​លេង​ UEFA Champions League នៅ​រដូវកាល​ក្រោយ។

កីឡាករ​សញ្ជាតិ​នីហ្សេរីយ៉ា​រូប​នេះ គឺ​ជា​អតីត​កីឡាករ​របស់​ក្លឹប LOSC Lille ដែល​បាន​ផ្ទេរ​មក Napoli កាល​ពី​ឆ្នាំ 2020។ បច្ចុប្បន្ន Victor Osimhen អាច​នឹង​មាន​តម្លៃ​ផ្ទេរ 80 លានផោន ហើយ​គាត់​នៅ​សល់​កុងត្រា​រហូត​ដល់ 3 ឆ្នាំ ជា​មួយ​ក្លឹប Napoli។

ប្រភព: Manchestereveningnews