Cole Palmer ប្រាប់​ឈ្មោះ​កីឡាករ​ដែល​ខ្លួន​គិត​ថា ល្អ​បំផុត​ក្នុង​ពិភព​បាល់ទាត់

ការ​ជជែក​ដេញដោល​គ្នា​ថា តើ​នរណា​ជា​កីឡាករ​ដ៏​​អស្ចារ្យ​បំផុត​ក្នុង​ពិភព​បាល់ទាត់​រវាង Lionel Messi និង Cristiano Ronaldo ប្រហែល​ជា​មិន​ទាន់​ត្រូវ​បាន​បញ្ចប់​នោះ​ទេ បើ​ទោះ​បី​ជា កីឡាករ​ឆ្នើម​របស់​អាហ្សង់ទីន Lionel Messi ទើប​នឹង​ឈ្នះពាន World Cup ដែល Cristiano Ronaldo មិន​ទាន់​ឈ្នះ​ក៏​ដោយ។

Lionel Messi និង Cristiano Ronaldo បាន​គ្រប់គ្រង​ពិភព​បាល់ទាត់​អស់​រយៈ​ពេល​ប្រហែល 15 ឆ្នាំ​មក​ហើយ ស្រប​ពេល​ដែល​អ្នក​ទាំង​ពី​បាន​ប្រកួត​ប្រជែង​គ្នា​ដ៏​ស្វិត​ស្វាញ ទាំង​ការ​ឈ្នះ​ពាន​ជាមួយ​ក្រុម និង​ការ​ឈ្នះ​ពាន​ជា​លក្ខណៈ​បុគ្គល។ ពាក់​ព័ន្ធ​នឹង​រឿង​នេះ​ដែរ ថ្មីៗ​នេះ​ខ្សែប្រយុទ្ធ​ឆ្នើម និង​ជា​ខ្សែ​ប្រយុទ្ធ​ចំណូល​ថ្មី​របស់​ក្លឹប​តោខៀវ Chelsea គឺ​កីឡាករ Cole Palmer បាន​បង្ហាញ​ពី​ទស្សនៈ​នៃ​ការ​យល់​ឃើញ​ផ្ទាល់​ខ្លួន​ដោយ​លើក​ឡើង​ពី​ឈ្មោះ​កីឡាករ​ល្អ​បំផុត​នៅ​ក្នុង​ពិភព​បាល់ទាត់។

នៅ​ក្នុង​កម្ម​វិធី​កម្សាន្ត​មួយ​ជាមួយ Sky Sports កីឡាករ​សញ្ជាតិ​អង់គ្លេស​រូប​នេះ​ត្រូវ​បាន​តម្រូវ​ឲ្យ​សរសេរ​ឈ្មោះ​មនុស្ស​ម្នាក់​ដែល​គាត់​គិត​ថា ជា​កីឡាករ​ល្អ​បំផុត​ក្នុង​ពិភព​បាល់ទាត់។ ពេល​នោះ Cole Palmer បាន​លើក​ផ្ទាំង​ក្ដារ​ពណ៌​ស ដោយ​មាន​ឈ្មោះ Messi ហើយ​គាត់​បាន​និយាយ​បន្ថែម​ថា៖ “ពិត​ណាស់​គឺ Messi ដោយ​សារ​តែ​របៀប​លេង​របស់​គាត់ និង​រាល់​ពាន​រង្វាន់​បុគ្គល​ដែល​គាត់​បាន​ឈ្នះ។ ជា​កីឡាករ​ល្អ​បំផុត​ដែល​មិន​ធ្លាប់​មាន… ច្បាស់​ណាស់ សម្រាប់​ខ្ញុំ​គឺ Messi”។

ប្រភព: Sky Sports Premier League