បាល់ទាត់អន្តរជាតិ
Man United និង Liverpool កំពុងចាប់អារម្មណ៍លើខ្សែការពារមួយរូបរបស់ក្រុមជម្រើសជាតិអេស្ប៉ាញ
ក្លឹបបិសាចក្រហម Manchester United និងហង្សក្រហម Liverpool ត្រូវបានគេរាយការណ៍ថា កំពុងមានចំណាប់អារម្មណ៍ក្នុងការចុះហត្ថលេខាលើខ្សែការពារកណ្តាលមួយរូបរបស់ក្លឹប Real Sociedad គឺកីឡាករ Robin Le Normand ហើយដំណើរការនៃការផ្ទេរអាចនឹងកើតឡើងនារដូវក្តៅ ចុងបញ្ចប់រដូវកាលនេះ។
យ៉ាងណាមិញ ក្លឹបទាំងពីររវាង Manchester United និងហង្សក្រហម Liverpool ត្រូវបានគេដឹងថា នឹងលូកដៃចូលក្នុងទីផ្សារដោះដូរកីឡាករឆ្នាំក្រោយ ដើម្បីស្វែងរកខ្សែការពារកណ្តាលចំណូលថ្មីម្នាក់ ហើយបច្ចុប្បន្នពួកគេកំពុងពេញចិត្តជាមួយនឹងទម្រង់លេងរបស់ Le Normand ដែលជាកីឡាករឆ្នើមមួយរូបរបស់ក្រុមជម្រើសជាតិអេស្ប៉ាញ។
យោងតាមរបាយការណ៍ពី TEAMtalk បានឲ្យដឹងថា ក្លឹបបិសាចក្រហម Manchester United និងហង្សក្រហម Liverpool កំពុងមានគម្រោងនាំយក Le Normand ទៅទឹកដីអង់គ្លេសនៅដើមរដូវកាលក្រោយ។ ខ្សែការពារឆ្នើមរូបនេះ បានរស់នៅក្នុងទ្រនំជាមួយ Real Sociedad តាំងពីឆ្នាំ 2018 មកម្ល៉េះ ហើយកុងត្រាបច្ចុប្បន្នរបស់គាត់មានសុពលភាពរហូតដល់ខែមិថុនា ឆ្នាំ 2026 ប៉ុន្តែគេបានដឹងថា គាត់អាចនឹងត្រូវបានក្លឹបរបស់ខ្លួនអនុញ្ញាតឲ្យចាកចេញ ប្រសិនបើពួកគេអាចទទួលបានសំណើរប្រហែល 50 លានអឺរ៉ូ (43.6 លានផោន)។
ប្រភព: Sportsmole