អតីត​កីឡាករ​មួយ​រូប​របស់​ក្លឹប PSG អះអាង​ថា ការ​ឈ្នះពាន Ballon d’Or របស់ Messi គឺ​ជា​រឿង​ដែល​មិន​សក្តិសម​ទាល់តែ​សោះ!!!

អតីត​ខ្សែ​ប្រយុទ្ធ​ស្លាប​របស់​ក្លឹប​យក្ស​បារាំង Paris Saint-Germain លោក Jerome Rothen បាន​អះអាង​ថា ខ្សែប្រយុទ្ធ Erling Haaland របស់​ក្លឹប​មេឃខៀវ Manchester City សម​នឹង​ឈ្នះ Ballon d’Or ឆ្នាំ 2023 ជាង​តារា​ឆ្នើម Lionel Messi របស់​ក្លឹប Inter Miami។

យ៉ាង​ណា​មិញ Jerome Rothen បាន​និយាយ​ដោយសង្កត់​ធ្ងន់​​ថា វា​ជា​រឿង​ដែល​មិន​សម​ហេតុផល​ទាល់តែ​សោះ​ដែល Lionel Messi ឈ្នះ​ Ballon d’Or ឆ្នាំ 2023 លើ Erling Haaland។ ការ​លើក​ឡើង​បែប​នេះ បាន​កើត​ឡើង​ក្រោយ​ពេល​ដែល Messi ត្រូវ​បាន​ប្រកាស​ជា​ផ្លូវការណ៍​ថា គាត់​ជា​អ្នកឈ្នះ Ballon d’Or 2023 កាល​ពី​ដើម​សប្តាហ៍​កន្លង​ទៅ។

Lionel Messi ដែល​ជា​ប្រធាន​ក្រុម​ពពក​ស​អាហ្សង់ទីន​បាន​ផ្តួល​សម្លេង​ឆ្នោត​របស់ Haaland និង Kylian Mbappe ជា​មួយ​នឹង​សមិទ្ធិផល​នៃ​ការ​ឈ្នះ World Cup របស់​គាត់​កាល​ពី​ឆ្នាំ​មុន។ ទោះ​ជា​យ៉ាង​ណា​ក៏​ដោយ ថ្លែង​នៅ​លើ RMC Sport លោក Rothen ជឿ​ជាក់​ថា Ballon d’Or មិន​មែន​ជា​​ពាន​ដែល​គួរ​ឲ្យ​ទុក​ចិត្ត​នោះ​ទេ បន្ទាប់​ពី Messi បាន​ឈ្នះ​​លើ Haaland ដែល​ជា​កីឡាករ​ដ៏​លេចធ្លោរ​ខ្លាំង​កាល​ពី​ឆ្នាំ​មុន។

Jerome Rothen បាន​និយាយ​ថា៖ “នោះ​ជា​រឿង​មិន​សម​ហេតុផល​ទាល់តែ​សោះ។ ពិត​ណាស់ នោះ​ជា​រឿង​មិន​សម​ឡើយ។ សម្រាប់​ខ្ញុំ វា​គឺ​ជា Haaland ដែល​គួរ​តែ​ឈ្នះ​វា។ ចាប់​ពី​ខែសីហា ឆ្នាំ 2022 ដល់​ខែ​មិថុនា ឆ្នាំ 2023 តើ​លក្ខណៈ​វិនិច្ឆ័យ​អ្វីខ្លះ​ដែល​នាំ​ឲ្យ​យើង​និយាយ​ថា Lionel Messi លើស​ពី​អ្នក​ដទៃ? ស្ទើរ​តែ​គ្មាន​លក្ខណៈ​វិនិច្ឆ័យ​ណា​ដែល​គាត់​មក​លេខ 1 ទេ។ ប្រសិន​បើ​អ្នក​ប្រាប់​ខ្ញុំ​អំពី​កំណត់ត្រា​នោះ គាត់​អន់​ជាង Haaland ទោះ​បី​ជា​គាត់​បាន​ឈ្នះ World Cup ក៏​ដោយ”។

ប្រភព: Dailypost NG