Eric Dier ត្រៀម​ចាកចេញ​ពី Tottenham Hotspur ក្នុង​នាម​ជា​កីឡាករ​ដែល​គ្មាន​តម្លៃ​ខ្លួន

ខ្សែការពារ Eric Dier របស់​ក្លឹប​មាន់ខ្នាយ​មាស Tottenham Hotspur ត្រូវ​បាន​គេ​រាយការណ៍​ថា នឹង​ចាកចេញ​ពី​ក្លឹប​បច្ចុប្បន្ន​របស់​ខ្លួន​ក្នុង​នាម​ជា​កីឡាករ​ដែល​ផុត​កុងត្រា​នៅ​រដូវក្តៅ​ឆ្នាំ​ក្រោយ ហើយ​គាត់​ប្រហែល​ជា​មិន​ត្រូវ​បាន​ក្លឹប​លក់​ចេញ​ក្នុង​អំឡុង​ពេល​ទីផ្សារ​ដោះដូរ​កីឡាករ​នា​ខែមករា​ដើម​ឆ្នាំ​ក្រោយ​នេះ​ឡើយ។

កីឡាករ​សញ្ជាតិ​អង់គ្លេស​រូប​នេះ​ដំបូង​ឡើយ គាត់​លេង​ក្នុង​តំណែង​ជា​ខ្សែបម្រើ​ការពារ តែ​ក្រោយ​មក​ដោយ​សារ​ទម្រង់​លេង និង​ភាព​ខ្វះ​ខាត​របស់​ក្រុម Eric Dier ក៏​ប្ដូរ​ទៅ​លេង​ជា​ខ្សែការពារ​កណ្ដាល​វិញ។ នៅ​ក្រោម​ការ​ដឹកនាំ​របស់​អតីត​គ្រូ​បង្វឹក​មុន​លោក Antonio Conte កីឡាករ​វ័យ 29 ឆ្នាំ​រូប​នេះ បាន​បង្ហាញ​សមត្ថភាព​យ៉ាង​ជាប់​លាប់ តែ​ក្រោយ​ការ​កាន់​កាប់​របស់​គ្រូ​ថ្មី​លោក Ange Postecoglou នៅ​រដូវកាល​នេះ គេ​មិន​សូវ​មាន​ឱកាស​ចូល​លេង​ឡើយ។

កុងត្រា​របស់ Eric Dier មាន​សុពលភាព​ដល់​ថ្ងៃទី 30 ខែ​មិថុនា ឆ្នាំ 2024 ប៉ុន្តែ​ក្លឹប Tottenham Hotspur មិន​បាន​អើពើ​ជា​មួយ​នឹង​ការ​ចរចា​កុងត្រា​ថ្មី​ជា​មួយ​គាត់​ឡើយ។ ដូច្នេះ​មាន​ន័យ​ថា នៅ​ចុង​បញ្ចប់​នៃ​រដូវកាល​នេះ គេ​នឹង​ផុត​កុងត្រា ហើយ​ចាកចេញ​ពី​ទ្រនំ​ដែល​ខ្លួន​ធ្លាប់​រស់​នៅ​អស់​រយៈពេល​ជិត 10 ឆ្នាំ​កន្លង​មក។

ប្រភព: Sportsmole