Barcelona កំពុង​មាន​ភាគរយ​ខ្ពស់ ក្នុង​ការ​ចុះ​ហត្ថលេខា​លើ Lo Celso ស្រប​ពេល​ដែល Gavi មាន​របួស​រយៈពេល​យូរ

ក្លឹប​អ្នក​មាន​បុណ្យ Barcelona ត្រូវ​បាន​គេ​រាយការណ៍​ថា កំពុង​សម្លឹង​មើល​ការ​ផ្ទេរ​ខ្សែបម្រើ​ឆ្នើម​មួយ​រូប​ដែល​អាច​ជំនួស​តំណែង​របស់ Gavi ដែល​កំពុង​មាន​របួស។ ក្លឹប​យក្ស​កាតាឡាន់​ត្រូវ​បាន​គេ​ដឹង​ថា នឹង​លូកដៃ​ចូល​ទៅ​ក្នុង​ទីផ្សារ​ដោះដូរ​កីឡាករ​នា​ខែ​មករា ដើម​ឆ្នាំ​ខាង​មុខ​នេះ ដើម្បី​ចុះ​ហត្ថលេខា​លើ​កីឡាករ​ចំណូល​ថ្មី​ម្នាក់​ទៀត។

យ៉ាង​ណា​មិញ Gavi នឹង​ត្រូវ​សម្រាក​មិន​អាច​ចូល​លេង​បាន​រហូត​ដល់​រដូវ​ក្តៅ​ឆ្នាំ​ក្រោយ បន្ទាប់​ពី​គាត់​បាន​រងរបួស ACL ក្នុង​អំឡុង​ពេល​បំពេញ​បេសកកម្ម​លេង​ឲ្យ​ក្រុម​ជម្រើស​ជាតិ​អេស្ប៉ាញ។ ជា​លទ្ធផល Barcelona នឹង​ត្រូវ​ខ្វះខាត​កីឡាករ​ដែល​លេង​នៅ​តំបន់​បម្រើ ហើយ​ពួក​គេ​ត្រូវ​បង្ខំ​ចិត្ត​ចុះ​ហត្ថលេខា រឺ​ខ្ចី​ជើង​កីឡាករ​ម្នាក់​ជា​ចាំបាច់។

យោងតាម​របាយការណ៍​ពី Sport និង Mundo Deportivo បាន​​រាយការណ៍​ថា Barcelona មាន​ផែនការ​រួច​ហើយ ក្នុង​ការ​ចុះហត្ថលេខា​លើ​ខ្សែបម្រើ Giovani Lo Celso។ កីឡាករ​អាហ្សង់ទីន​រូប​នេះ ធ្លាប់​ត្រូវ​បាន​ផ្សារ​ភ្ជាប់​ជា​មួយ​នឹង Barcelona តាំង​ពី​រដូវក្តៅ​ឆ្នាំ​មុន​ម្ល៉េះ ប៉ុន្តែ​ការ​ផ្ទេរ​បាន​បរាជ័យ។

បញ្ហា​ហិរញ្ញ​វត្ថុ​នឹង​នៅ​តែ​ជាបញ្ហា​សម្រាប់​ក្លឹប​យក្ស​អេស្ប៉ាញ​មួយ​នេះ បើ​ទោះ​បី​ជា​ពួក​គេ​អាច​ប្រើប្រាស់​សិទ្ធិ​កាត់​ប្រាក់​ខែ 80% នៃ​ប្រាក់ខែ​របស់ Gavi ក៏​ដោយ។ ទោះ​ជា​យ៉ាង​ណា Barcelona នឹង​ព្យាយាម​នាំយក Giovani Lo Celso ក្នុង​លក្ខខ័ណ្ឌ​ខ្ចី​ជើង​ពី Tottenham Hotspur រយៈពេល 6 ខែ​ជា​មុន​សិន ហើយ​កីឡាករ​វ័យ 27 ឆ្នាំ​រូប​នេះ ក៏​ហាក់​ពេញ​ចិត្ត​នឹង​ការ​ផ្ទេរ​មក​ទឹកដី​អេស្ប៉ាញ​ផង​ដែរ ស្រប​ពេល​ដែល​គាត់​មិន​សូវ​មាន​ឱកាស​លេង​បាន​ច្រើន​ឡើយ​នៅ​ក្លឹប​បច្ចុប្បន្ន​របស់​ខ្លួន។

ប្រភព: Barcablaugranes