Xavi បង្ហើប​ថា ខ្លួន​ចង់​ចុះ​ហត្ថលេខា​នាំ​យក Alvaro Morata មក Camp Nou

គ្រូ​បង្វឹក​របស់​ក្លឹប​អ្នក​មាន​បុណ្យ Barcelona លោក Xavi Hernandez បាន​បង្ហើប​ថា លោក​ចង់​នាំយក​ខ្សែប្រយុទ្ធ​របស់​ក្លឹប Atletico Madrid គឺ​កីឡាករ Alvaro Morata មក​កាន់​ទឹកដី Camp Nou។ សម្រាប់​រយៈពេល​មួយ​រដូវកាល​កន្លះ​កន្លង​មក ខ្សែប្រយុទ្ធ​កណ្ដាល​របស់ Barcelona ត្រូវ​បាន​កាន់​កាប់​ដោយ Robert Lewandowski ហើយ​កីឡាករ​ឆ្នើម​រូប​នេះ ក៏​បាន​ក្លាយ​ម្ចាស់​គ្រាប់​បាល់​ច្រើន​ជាង​គេ​ប្រចាំ​លីគ​កំពូល​របស់​អេស្ប៉ាញ​ផង​ដែរ​កាល​ពី​រដូវកាល​មុន។

ទោះ​ជា​យ៉ាង​ណា​ក៏​ដោយ អតីត​កីឡាករ​របស់​ក្លឹប Bayern Munich រូប​នេះ ហាក់​ដូច​ជា​ពិបាក​រក​គ្រាប់​បាល់​ជាង​រដូវកាល​មុន ដោយ​ឆ្លង​កាត់ 12 ប្រកួត​កន្លង​មក គាត់​រក​បាន​គ្រាប់​បាល់​ត្រឹមតែ 7 គ្រាប់​ប៉ុណ្ណោះ។ ស្រប​ពេល​ជា​មួយ​គ្នា​នេះ​ដែរ Barcelona ក៏​មាន​គ្រាប់​បាល់​សរុប​ត្រឹមតែ 27 គ្រាប់​ប៉ុណ្ណោះ ពី​ការ​ប្រកួត​ទាំង 14 លើក​របស់​ពួក​គេ ដែល​នេះ​ជា​ស្ថិតិ​គ្រាប់បាល់​ទាប​បំផុត​ក្នុង​ចំណោមក្រុម​កំពូល​ទាំង 5 នៃ​តារាង La Liga។

ក្រុម​របស់​លោក Xavi Hernandez បាន​ពង្រឹង​តំបន់​ប្រយុទ្ធ​របស់​ពួកគេ កាល​ពី​នៅ​រដូវក្តៅ​កន្លង​ទៅ ជាមួយ​នឹង​ការ​ខ្ចី​ជើង Joao Felix ពី Atletico Madrid ខណៈ​ដែល Raphinha, Ferran Torres និង Lamine Yamal គឺ​ជា​ជម្រើស​ផ្សេង​ទៀត​នៅ​តំបន់​ខាង​លើ​ដូច​គ្នា។

យ៉ាង​ណា​ក៏ដោយ Lewandowski គឺ​ជា​ខ្សែប្រយុទ្ធ​កណ្តាល​តែ​ម្នាក់​គត់ ហើយ​កាល​ពី​ម្សិលមិញ​នេះ​លោក Xavi Hernandez បាន​និយាយ​ទៅ​កាន់​អ្នក​សារព័ត៌មាន​ក្នុង​សន្និសីទ​កាសែត​មួយ​ថា គាត់​ធ្លាប់​បាន​ទាក់ទង​និយាយ​ជាមួយ Morata អំពី​ការ​ទិញ​យក​កីឡាករ​សញ្ជាតិ​អេស្ប៉ាញ​រូប​នេះ​ទៅ Barcelona។

Xavi Hernandez បាន​និយាយ​ដោយ​សារភាព​ថា៖ “វា​ជា​ការ​ពិត​ដែល​ខ្ញុំ​ចង់​ចុះ​ហត្ថលេខា​លើ​គាត់ (Morata)។ វា​អាច​ទៅ​រួច។ ខ្ញុំ​បាន​និយាយ​ជាមួយ​គាត់ ហើយ​ខ្ញុំ​ចង់​បាន​គាត់​នៅ​ក្នុង​ក្រុម​របស់​ខ្ញុំ ប៉ុន្តែ​វា​មិន​អាច​កើត​ឡើង​នោះ​ទេ។ គាត់​ជា​ខ្សែប្រយុទ្ធ​ដែល​ខ្ញុំ​ពិត​ជា​ចូលចិត្ត។ Morata គឺ​ជា​ខ្សែប្រយុទ្ធ​ដ៏​អស្ចារ្យ​ម្នាក់”។

ប្រភព: Sportsmole